Skip to main content

Sermersooq: Inatsisitigut isumannaassuseq Naalakkersuisut siunnersuutaanit ulorianartorsiortinneqarpoq

Illoqarfiit pingaarnersaata kommuniata meeqqat tapersersorneqarnissaannut nalunaarut nutaaq, Naalakkersuisut tusarniaassutigisimasaat annertumik isornartorsiorpaa. Kommunimit isumaqartoqarpoq, inatsisitigut isumannaassuseq eqqarsaatigalugu nalunaarusiaq nangaanartortaqartoq.

Nalunaarut nutaaq naapertorlugu kommunit pisussaaffilerneqarsimapput, "Meeqqat tapersersorneqarnissaannut Inatsisartut inatsisaannut ilitsersuutit, najoqqutassat aamma ikiuutissatut atortut allat Pitsaaliuinermut Isumaginninnermullu Aqutsisoqarfiup suliarisimasaasa atorneqartarnissaannut", siunnersuummi tusarniaassutigineqartumi allassimavoq.

- Kommunit sulisuinik ikorfartuinissaq ilinniartitsinissarlu sapinngisamik pitsaanerpaamik aqutsisoqarfimmit ingerlanneqaqqullugu, aqutsisoqarfimmit ikorfartorneqartunik, assigiiaartumik ataqatigiissillugit aaqqissuussinernik kommunit atuinissaat pingaaruteqarluinnarpoq. Tamanna aalajangersakkamik nutaamik ikkussinikkut, tassani aqutsisoqarfimmit suliarineqarsimasunik ilitsersuutinik il.il. tamatigut malinninneqartussanik, kommuninut pisussaaffiliinikkut qulakkeerneqarpoq, nassuiaat taamatut allassimavoq.

Inatsisitigut isumannaassuseq ulorianartorsiortinneqartoq

Kommuneqarfik Sermersuumili isumaqartoqarpoq, siunnersuut ”inatsisitigut isumannaassuseq eqqarsaatigalugu nangaanartortaqartoq”, oqaatigalugulu ilitsersuutinik allannguiniarnermi tusarniaanissaq nalunaaruteqarnissarlu piumasaqaataanngitsut.

- Ilitsersuutit imai, inatsisinut tunngatillugit allaffeqarfimmi tusarniaanerullu ingerlanerani pitsaassutsimikkut nalinginnaasumik misissorneqarneq ajorput, illoqarfiit pingaarnersaata kommuniata tusarniaanermut akissummini erseqqissaatigaa.

- Ilitsersuut nalinginnaasumik innuttaasunut inatsisitigut pituttuisuuneq ajormat, aamma ilitsersuummi malittarisassat assersuutigalugu naammagittaalliornissamut nalinginnaasumik tunngavissiineq ajormata, ilitsersuummi immikkut ittumik aalajangersagaliorneq inatsisitigut isumannaassuseq eqqarsaatigalugu nangaanartortaqarpoq, kommunip meeqqat ulloq unnuarlu paaqqinnittarfinnut inissinneqarsimasut ilaqutariittut paaqqinnittartunut nuunneqartarnissaat pillugu iloqarfiit pingaarnersaata kommuniata periusissiaanut pingaarutilik tigussaasutut assersuutigalugu oqaatigaa.

-  Assersuutissaqqissutut oqaatigineqarsinnaapput, Oqartussanut ilitsersuutip qupperneq 67-iani allassimasoq, tassani ulloq unnuarlu paaqqinnittarfimmiit ilaqutariittut paaqqinnittartunut nuussiniarnermut atatillugu paaqqinnittarfimmit aninissamut ullut sioqqullugit nalunaaruteqarfissat. Ilitsersuummi pineqartumi sapaatip akunneri arfinillit imaluunniit aqqaneq-marluk sioqqullugit nalunaaruteqartoqartussaavoq, apeqqutaalluni meeraq innarluutilik ulloq unnuarlu paaqqinnittarfimmiittoq pineqarnersoq (sap.ak. aqqaneq-marluk) imaluunniit innarluuteqanngitsoq pineqarnersoq (sap.ak. arfinillit). Taamatut piffissaliisimanerit inatsimmi, § 30, imm. 4-mi oqartussanut tunngatillugu taamaallaat aalajangersagartaqartoq, imaluunniit nalunaarummi allassimanngillat, taamaallaallu ilitsersuummi allassimallutik, Kommuneqarfik Sermersooq allappoq, nangillunilu:

Aaqqiagiinngissutaasinnaasoq

- Malittarisassaq tamanna illuatungiusumut meeqqalluunniit pisinnaatitaaffiinut pisussaaffiinullunniit toqqannartumik sunniuteqarsinnaasutut assersuutissaavoq. Tamatuma saniatigugut kommunip najugaqarfigisap ulloq unnuarlu paaqqinnittarifmmit anisitsinissamik kissaateqarnera, kommunip aamma ulloq unnuarlu paaqqinnittarfiup akornanni aaqqiagiinngissutaaalersinnaavoq. Malittarisassaq taamaammat inatsimmi nalunaarummiluunniit allassimasariaqarpoq, ilitsersuummut, tusarniaassutigineqarsimananilu pisortatigoortumik saqqummiunneqarsimanngitsumut taamaallaat ilaatinnagu.

Kommunimit isumaqartoqarpoq, nalunaarut nutaaq - atuutsinneqalissaguni - "assigiimmik ingerlatsinissamut sanilliullugu paatsuunganermik pilersitsiinnassasoq”, innersuussutigalugulu ilitsersuut tusarniaassutigineqanngisaannarsimasoq taamalu pitsaassutsimigut misissorneqarsimanani.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER