Sermersooq: Ikuallaavissap nutaap inissisimaffissaa
Nuummi pisortat ataatsimoorussamik ikuallaavissaat Qeqertaniissanngilaq, tamanna aallaqqaammut pilersaarutaagaluarpoq, inissisimaffissaraluanulli taarsiullugu maanna ikuallaaviup eqqaanut inissinneqassaaq.
Nuummi suliffeqarfippassuarnit ikuallaavissap nutaap atlantikoortaatinut umiarsualivimmut qanittumi Qeqertaniisinniarneqarnera isornartorsiungaatsiarsimavaat. Maannali Sanarfinermut Avatangiisinullu Ataatsimiititap eqqagassaleriffik Esani A/S siunersiueqatigereerlugu allamut inissinneqarnissaa inassutigisimavaat, pissutsit assigiinngitsut erseqqissaatigineqarsimanerat pissutigalugu.
Aamma atuaruk: Ikuallaavissap inissisimaffissaa akerlerineqaqisoq allanngortinneqarsinnaavoq
Ingerlatsivimmi pisortap Hans Henrik Wintherip ataatsimiititami politikkerinut inassuteqaammini pissutsit tallimat, ikuallaaviup atuuttup inissisimaffigeriigaanut sooq inissikkusunneqarneranik erseqqissaasut saqqummiussimavai.
- Ikuallaavimmi pioreersumi atortut pigineqareersut annertunerusumik atorneqalersinnaapput, ikuallaaviup nutaap attassinnaasup atorneqaleriartornera ilutigalugu, tunngavilersuutit ilaat taamatut nipeqarpoq. Aamma ungasianiit kiassarneq pioreersoq pitsaanerpaamik atorneqareermat aammalu Kangerluarsunnguamiit pilersuinerup ikuallaavimmit nutaamiit sinneruttumik avatangiisinut mingutsitsinnginnerusumik nukissiuutiliorfiusumit pilersueqataatinnissaa eqqarsaatigineqarmat.
Sanaartorfigissaanermut aningaasanik sipaaruteqartoqassasoq
Ingerlatsivilli ikuallaavissamut tunngassuteqanngitsunik allarluinnarnik tunngavilersuuteqarpoq, tassani pineqarluni illoqarfiit pingaarnersaanni inuussutissarsiortunut toqqavissaqarluarnissap qulakkeerneqarnissaa.
Ikuallaavissap Qeqertaniitinneqarniarunnaarnerani, umiatsiat containerillu Isuliffimmiit Qinnguanut nuunneqarniarput. Taamatut iliornikkut ”inuussutissarsiorfinnut m2-erpaaluit atugassiissutaasinnaanngussapput”, ingerlatsivimmi pisortaq oqarpoq.
- Inissiiffiusartumik allamut, suli innaallagissamut, imermut kiassanermullu tunngatillugu sanaartorfissagissagaanngitsumut, nuutitsineq kommunimut iluaqutaanerussasoq, suliassamik saqqummiussinermi erseqqissaatigineqarpoq. Tassani Isuliffimmi toqqaviit sanaartorfissagissarneqareersimammata kommunip aningaasanik pisariaqartitsinera annikillisinneqassaammat.
Inissiaqarfinnut qaninnerusoq
Ilisimatitsissutigineqarpoq, ikuallaaviup pioreersup nutaamik sanasoqarnerata nalaani atorsinnaanera qulakkeerneqassasoq.
Ikuallaavissap nutaap nutaaliaanerusullu inissiaqarfiit suliffeqarfiillu eqqaaniitinneqarnissaa ingerlatsivimmit ajornartorsiutaasinnaasutut isigineqanngilaq.
- Ikuallaavik nutaaliaasoq attassisinnaasunngorlugu ingerlanneqassappat avatangiisinut tunngasunik piumasaqaatinik sukannersunik naammassinnissinnaasariaqarpoq, Hans Henrik Winther Johannsen allappoq, ilaatigullu Danmarki eqqaallugu, tassani ikuallaaviit ”amerlanertigut inuussutissarsiuteqarfiit angisuut imaluunniit inissiaqarfiit eqqannguanni inissisimasarput, taamaasilluni kissaq ikuallaavinnit pilersinneqartoq inissianut suliffeqarfinnullu eqqaaniittunut atorluarneqarsinnaaqqullugu” inissinneqartarmata.
Ingerlariaqqinnissaq
Kommunimut pilersaarummut tapiliussamik nutaamik tusarniaassutigineqartussamik suliaqartoqassaaq. Siullertut siunnersuut, ataatsimiititami politikkerinit akueineqassapput, Aningaasaqarnermut Inuussutissarsiornermullu Ataatsimiititami kiislu kommunalbestyrelsimilu akuerisassanngorlugu nassiunneqassaaq.
Sanarfinermut Avatangiisinullu Ataatsimiititaq februaarip 15-iani ataatsimiissaaq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...