Sermersooq: IA Siumumut isornartorsiuivoq

Kommuneqarfik Sermersuumi Inuit Ataqatigiit aamma Siumut suleqatigiinniarnerat kipiluttunarpoq.

Tassami aningaasanut missingersuummit, amerlanerussuteqartunit isumaqatigiissuteqarfioqqammersummit, tunngatillugu sulinermi Inge Olsvig Brandtip (IA) Siumut isornartorsiorpaa.

Isumaqatiginninniarnermi Siumut peqataanngippallaarsimasoq tusagassiutinut nalunaarummi allappoq.

- Aningaasanut missingersuut kommunalbestyrelsimi eqqartorneqartillugu, aallaqqaammut Siumumit oqaaseqartitaq politikkikkut anguniakkanut isumaqataasarpoq, kingornali akerliulluni taasisarluni. Tamanna sumik patsiseqarnersoq paasiuminaappoq, isigaluguli kanngusuusaarnartaqaaq, allappoq.

Isornartorsiuineq paasisinnaanngilaa

Inge Olsvig Brandtip taamatut isornartorsiuinera Siumup gruppiani siulittaasumit Peter Davidsenimit paasiuminaatsinneqarpoq. Siumut budgetregulativemut taaseqataasimalluni oqarpoq, tassuunalu isumaqatiginninniartoqaqqinnissaanut siunnerfeqartartoq oqaatigalugu.

- Taamaattoq isumaqatiginninniariaaseq apeqqusernikuuarput. Isumaqatiginninniartoqareersoq isumaqatigiittoqarsimasoq oqaatigineqarpoq isumaqatigiissuteqartunit, taamaattorli partiit akornanni isumaqatiginninniartoqanngilaq. Isumaqatiginninniarnermut tunngatillugu siunnersuutit tunngavilersorneqanngillat aamma politikkikkut oqallisigineqanngillat, Peter Davidsen oqarpoq.

Partiit akornanni gruppini siulittaasut taamaallaat borgmesterimit qaaqquneqarsimasut oqaatigaa.

- Tassanngaannit partiit iluini isumaqatiginninniartoqanngilaq, borgmesteri kisimi oqaloqatigineqarpoq. Isumaqatiginninniarnermi kommunalbestyrelsimi ilaasortat tamarmik isumaqatiginninniarnermi peqataasussaasimagaluartut isumaqarpugut. Tassuuna IA-p kommunalbestyrelsimi sulinissamut sumiginnaapput, Peter Davidsen oqarpoq.

Akerleriinneq

Siumut-gruppip politikkikkut ataatsimut anguniakkanut piumassuseqanngippaallaarnera imaluunniit sulissutiginissaannut pikkorissuseqannginnera isumakulunnarluinnartutut Inge Olsvig Brandtip oqaatigaa.

- Siumut-gruppip politikkikkut sulinermini siunnersuutinut aaqqissuussinermut tunngasunut piffissaq annertooq atortarpaa. Pisat atorfilittat suliassaannut tunngasuusut, politikkikkullu sulinermut attuumassuteqarpallaanngitsut, Inge Olsvig Brandt allappoq.

Tamanna Peter Davisenip ima akivaa:

- Partiinut allanut isumaqatiginninniutissanik uagut nassiussinikuuvugut, IA-mit isumaqatiginninniutaasinnaasunik tigusaqanngilagut. Isornartorsiuineq killormut sangutissinnaavoq, tassami IA politikkikkut anguniakkaminnik saqqummiussinikuunngillat. Atorfillit innersuutaat kisimi malittarpaat. IA-mit anguniakkanik ersarissunik ataasiaannarluunniit takusaqanngilagut, Siumup gruppiani siulittaasoq oqarpoq.

IA-p isornartorsiuinera puupassaarinerusoq tikkuarpaa.

- Kommunimut qinersisoqangajalermat paatsiveerussaallutik taamatut saqqummerput. Isumaqatigiissut torrallataanngimmat uagutsinnut pisuutitsiniarlutik isornartorsiuipput, Peter Davidsen oqarpoq.

Nutaarsiassat

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...