Sermersooq: IA-p gruppiata borgmesteriutitartik illersoraat

Kommuneqarfik Sermersuumi borgmesteri Charlotte Ludvigsen juulip 22-ani Nuummi innuttaasorpassuit sialuup anorillu ataani nalunaaquttap-akunnerini pingasuni tulleriaattuni utaqqeqataareerlutik angerlartiinnarneqarfianni, tulleriaattunik qaangiisimanermini isornartorsiorneqaqaaq.

Kommuneqarfik Sermersuumi IA-p gruppiata ajuusaarutigaa, borgmesterip Charlottq Ludvigsenip aappassaanik coronamut akiuussutissalertinnissamut taamatut siulliunneqarsimanera ajuusaarutigaat, gruppilli borgmesterertik suli tapersersorpaat.

- Piffissap ingerlanerani sukkulluunniit borgmesterip siunertarisimanngilaa immikkut
pineqarnissi, siusinnerusukkullumi borgmesterip politikkeritut sulinerani ersiutissaqarsimanngilaq borgmesteri politikkikkut pissaanermik atornerluiniartutut iliuuseqartartoq, gruppip siulittaasua Juaaka Lyberth tusagassiorfinnut nalunaaruteqarluni allappoq.

Sioorasaarutigineqarsimasut iternga tikillugu misissorneqassasut

IA-p gruppiata nassuerutigaat, bormesterip tulleriaattut qaangiinnarlugit akiuussutissalertissimanera kukkunerusoq. Peqatigitilluguli erseqqissaassutigaat, atorfilittat kimigiisernerat ikiorsiullugu akiuussutissalerneqarnissani kissaatigisimanngisaannaraa. Taamaammat IA-p gruppiata, kommunimi Siumukkut assigalugit pisimasup qulaajaaffigineqarnissaa kissaatigaat.

- Qunusaarutaasinnaasumik Borgmesteri sukkulluunniit kimulluunniit
saqqummiussaqarsimanngilaq, sulisullu arlaat qunusaarneqarsimasutut misigisimasimassappat, kommunip allaffeqarfiani tamanna iternga tikillugu misissuiffigineqassaa qularutigineqassanngilaq, Kommuneqarfik Sermersuumi IA-p gruppia allappoq.

Kommuni ikiuuttuarniartoq

Kommuneqarfik Sermersooq akiuussutissalersuinermi illoqarfinni nunaqarfinnilu innuttaasut misissortinnissaannut akiuussutissalerneqarnissaannullu ininik assigiinngitsunik atugassaqartitsisimavoq. Tunillaassortumillu Nappaalaneqarneranut Ataatsimiititaliarsuup ikiorserneqarneq pisariaqarunnaarnerarlugu oqaaseqarnissaata tungaanut kommunalbestyrelsi ataatsimiititaliarsuup sulineranut ikiuuttuassasoq, IA-p gruppianit erseqqissaassutigineqarpoq.

- IA-gruppimit kajumissaarutigissavarput coronap tuniluussuutinnginnissaannut suliniutit aaqqissuinerillu siunissamut isigaluni ingerlateqqinneqarnissaat, akiuussutissamillu kapuinerit pilersaarutigineqartutut ingerlateqqinneqarnissaat, Nuummiinnaanngitsoq aammali Nunatsinni tamarmi, tamanna innuttaasunut tamanut ajunnginnerpaasussaammat. Ataatsimoorussamik siunertaqarpugut tassalu misissuisarfinnut akiuussusersuiffinnullu anngunnissaminnut innuttaasut pitsaanerpaanik periarfissiuunneqarnissaannik, Kommuneqarfik Sermsersuumi IA-p gruppia allappoq.