Sermersooq: IA D aamma N isumaqatigiipput

Inuit Ataqatigiit Demokraatinut aamma Naleqqamut Kommuneqarfik Sermersuumi kommunalbestyrelsemi isumaqatigiissutertik atsiorpaat. Charlotte Ludvigsen taamaasilluni borgmesteritut ingerlaqqippoq.

- Suleqatigiilluartareerpugut, aamma naatsorsuutigaara ukiuni sisamani tulliuttuni suleqatigiilluarumaartugut. 2019-imi Demokraatit isumaqatigiissutitsinniit anigaluartut taamaattoq suleqatigiinnavissimavagut, aamma naatsorsuutigaara tunniusimalluta ukiuni sisamani tullerni suleqatigeeqqikkumaartugut, borgmester Charlotte Ludvigsen oqarpoq.

Justus Hansen (D) suleqatigiinnerup ingerlaqqinnera nuannaarutigaa.

- Nuannaarutigaara isumaqatigiissinnaangatta aningaasanut missingersuut siorna atsiugarput malillugu suleqatigiissalluta, isumaqatigiissummik ullumi atsiornerup kingorna taama oqarpoq.

Naleraq isumaqatiginninniarnerni tusaaneqarluarsimasutut aamma misigivoq, suleqataalernissamullu qilanaarluni.

- Ilaatigut Tasiilamit, Ittoqqortoormiinit aamma Paamiunit kissaatit apuussimavagut. Qujavugut tusarnaarneqarluaratta, kommunilu tamaat pillugu suleqataanissamut piareersimavugut, Pele Broberg (N) oqarpoq.

Kommunalbestyrelse 19-inik ilaasortaatitaqartoq taakkunannga suleqatigiilersut 13-iupput.

Isumaqatigiissut ukiuni sisamani atuuttoq qulequtserneqarsimavoq ”Annertusaaneq – Toqqissisimaneq – Ineriartorneq”.

Partiit pingasut politikkikkut tunngaviusumik isumaqatigiissuteqarput, ukiuni sisamani tullerni suliniutissaminnik.

Sammisat qitiusut ukuupput:

• Ineqarneq
• Ilaqutariinnut najugassaqqissoq
• Atuarfeqarneq, meeqqeriveqarneq ornittakkallu amerlanerit pitsaanerillu
• Utoqqarnut inuuneq aalanarnerusoq
• Meeqqanut inuusuttunullu neqeroorutit ullutsinnut naleqquttut
• Inuit innarluutilinnut neqeroorutit
• Ineriartorneq oqimaaqatigiissoq
• Illoqarfiit nunaqarfiillu ineriartortinneri
• Kommune piujuaannartitsisoq
• Sermersooq – kulturip, timersornerup aamma assigiinngisitaarnerup kommunia

Kommuneqarfik Sermersuumi inissaaleqineq politikkikkut oqallinnerni ukiuni kingullerni initungaatsiarsimavoq. Charlotte Ludvigsen qineqqusaarnerup nalaani oqariartuuteqarpoq Nuummi inissiat 1850-it sanaartorneqartariaqartut. Taamatullu ilaqutariit meerartallit, meeqqeriviit inuillu innarluutillit atugarisaasa pitsaanerulersinnissaat isumaqatigiissummi 2021-2024-mi atuuttussami ukkatarineqarput.

Kina borgmesterimut tulliussanersoq, kikkullu ataatsimiititaliani siulittaasuussanersut, kommunalbestyrelse inissititerluni ataatsimiinnerani inissinneqarumaarput.