Sermersooq: Atuartut suliatigut pikkoriffillit qaffasinnerusunik suliassaqartinneqartassasut
Kommuneqarfik Sermersuumi qinikkat atuartunut suliatigut pikkoriffeqartunut misiliutitut aaqqiissuteqarniarlutik aalajangersimavaat. Aaqqiissut ukiup atuarfiusup tulliani atuarfimmi ataatsimi misiliutitut ingerlanneqassaaq.
Atuartut suliatigut pikkoriffillit meeqqat atuarfianni suliaqartinneqarnerullutillu suliassanik qaffasinnerusumik uummarissaataasinnaasunik tunineqartassapput. Kommuneqarfik Sermersuumi kommunalbestyrelsi Nuummi ukiup atuarfiusup tulliani misiliutitut ingerltsisoqassasoq aalajangersimavoq.
Aaqqiissut ukiup atuarfiusup tulliani atuarfimmi ataatsimi misiliutitut ingerlanneqassaaq. Tamatuma kingorna illoqarfinni atuarfinnut tamanut aaqqiissut atuutilersinneqarnissaa pilersaarutaavoq, Kommuneqarfik Sermersooq nittartakkamigut allappoq.
Suli atuarfik suliniummik ingerlatsisussaq aalajangerneqanngilaq. Pilersaarutaavorli atuartut suliatigut pikkoriffillit suliaqartinneqarnerunissaat aamma suliassanik qaffasinnerusumik uummarissaataasinnaasunik tunineqartarnissaat, ilinniatitsinermilu nammineertiinnarneqartannginnissaat.
- Nalinginnaasumik atuartunut ilungersuuterpassualinnut aningaasanik sulisunilu atuingaatsiartarpugut. Soorunami tamanna pingaaruteqarpoq, ajoraluartumillu tamatuma kingunerisaanik ilinniartitsisut atuartunik pisariaqartitsisunik ikiuinerisa nalaani atuartut suliatigut pikkoriffeqartut nammineertiinnarneqarput, fagchefi Riikki Grønvold oqarpoq.
Pikkorissartarfeqalissasoq
Maannakkuugallartoq pikkorissartarfissamik pilersitsinissaq pilersaarutaavoq, tassani atuartut klassinit assigiinngitsuneersut katersuussinnaassapput suliassanillu qaffasinnerusumik uummarissaataasinnaasunik tunineqarlutik.
- Meeqqat atuarfiutigut tamanut ammapput. Atuartunut suliatigut pikkoriffeqartunut kiisalu atuartunut unammilligassaqartunut, Riikki Grønvold suliniutip ukiumi siullermi misiliutaanerani malinnaanissaminut qilanaartoq oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...