Sermersooq: Ataatsimiititap miliuunilikkaanik taarsigassarsiat akuerissagaat

Illoqarfiit pingaarnersaata kommuniani borgmesteri tallimanngormat tupaallannartumik nalunaaruteqarpoq. Tusagassiorfinnut nalunaaruteqarluni kommunimi pisortaasimasut marluk kukkusumik paasissutissiisarsimasutut namminerisaminnillu iliuuseqartarsimasutut pasillerpai. Pisortaasimasut marluullutik passilliutigineqartut ilumuunnginnerarpaat.

Borgmesterip pasilliuteqarnerminut tunngaviunerarpaa, Iserimmut taarsigassarsiarititat 20 millioner koruuniusut, kommunimi Aningaasaqarnermut Inuussutissarsiornermullu Ataatsimiitiami politikkikkut akueriteqqaarnagit atsiorsimallugit.

Borgmesterip Sermitsiaq.AG-mut ilisimatitsissutigaa, taarsigassarsiat pillugit suliaq ataatsimiititap ataasinngornermi ataatsimiinnermini suliariniaraa.

- Tusagassiorfinnut nalunaaruteqarninnut pissutaavoq, taarsigassarsianut 20 millioner koruuniusunut ataatsimiititami suliarineqarsimanngitsunut akuersisimanera, Charlotte Ludvigsen oqarpoq.

- Nutaanik suli nassaartoqartartoq

Borgmesteri ataatsimiinnermi tatineqartussaavoq, partiimmi suleqataasup Demokraatit sapaatiummat nalunaarutigaam borgmesteri tunuartariaqartoq. Partiip kommunalbestyrelsimi ilaasortaatitaasa bormesteri tatigiunnaarsimavaat. Tamatuma saniatigut illuatungiliuttut Siumukkut sakkortuumik isornartorsiuisareerput.

Borgmesteri naapertorlugut suliamut pineqartumut pissutaavoq, kommunip ineqarnermut tunngatillugu aqutsinerani kommunillu inissiaatileqatigiiffiutaani Iserimmi ingerlatsisarnerup kommunip saliinera. Ineqarnermut tunngatillugu suliap malitsigisaanik saliisoqarpoq, Kommunnut Nakkutilliisoqarfiup kommunimut sakkortuumik isornartorsiuereernerata kinguneranik.

Borgmesterip oqaatigaa, 20 millioner koruunit pillugit suliaq sapaatip-akunnerisa marluk kingulliit ingerlaneranni saqqummersimavoq.

- Nutaanik suli nassaartarpugut. Taakku inatsisinut naapertuuttunngortinniarlugit tamaviaarluta sulivugut, borgmesteri illunik quleriinnik initalinnik pisiaqarnissamut taarsigassarsinissaq pisussaaffiusoq ilanngullugu oqaaseqartoq oqarpoq.

- Qanoq isumaqarnersut oqaatigisinnaanngilara

Borgmesterip suliaq ajuusaarutigaa, isumaqarlunili nammineq inuttut akisussaatinneqarsinnaanani, isumaqarami pisortaasimasunit kukkusumik paasitinneqartarsimalluni - aamma kommunimi pisortaasimasumit Lars Møller-Sørensenimit. Pisortaasimasut marluullutik pasilliutigineqartut ilumuunnginnerarpaat. Lars Møller-Sørensenip ilanngullugu oqaatigaa, siusinnerusukkut atorfeqarsimasutut pisinnaatitaaffitik borgmesterimit soqutigineqanngitsut.

Atorfeqarsimasut pasilliutigisannut qanoq imminnut illersorsinnaassappat?

- Uannut nassuiaatigineqarsimasut kukkusuupput. Qsnoq taakku isumaqarnersut oqaatigisinnaanngilara, pappialalli uannut saqqummiunneqartut tatigisinnaasariaqarpakka, Charlotte Ludvigsen oqarpoq.

Nakkutilliisut isornartorsiutaat ataatsimiinnermi suliarineqassasut

20 millioner koruuninik taarsigassarsisimaneq pillugu ataatsimiinneq, Nakkutilliiisut kommunip ineqarnermut tunngatillugu suliaanut isornartorsiutai pillugit kommunalbestyrelsip tamarmiusumut ataatsimiinnissaa ullormik ataatsimik sioqqullugu pissaaq.

Nakkutilliisut ilaatigut borgmesterimut ingerlatsivimmillu isornartorsiutigisimavaat, namminersortunut arlalinnik attartoriarluni amigartoorutaasumik innuttaasunut attartortitseqqiisarsimaneq politikkikkut akueriteqqaarneqartarsimannginnera.