Sermersooq Tasiilami suliffissaaleqisoqarneranut immikkut ittumik iliuuseqartoq

Kommuneqarfik Sermersooq tunumi illoqarfimmi inuusuttut suliffissaaleqinerat akiorniarlugu suliffeqarfimmik isumaqatigiissuteqarsimavoq.

Kommuneqarfik Sermersuumi politikerinit isumaqatigiissutigineqarpoq ataatsimoorullugu suliffissaqartitsinermut tunngatillugu suliniut Siu- Tsiu ingerlanneqassasoq, taanna juunimi Tasiilami pilersinneqarpoq

Kommune ukiuni pingasuni tulliuttuni atugassanik 2,2 millioner koruunit atorlugit inuusuttut ilinniartinneqarnissaannut pisiumavoq, aningaasat Tasiilami inuusuttut suliffissaaleqiunnaasinniarneqarnerannut ikiuutaassapput, Kommuneqarfik Sermersooq nittartakkamigut allappoq.

- Kommunip tapiissuteqarneratigut inuusuttut suliniummut, maannakkuugallartoq 2024-p tungaanut, attuumassuteqartinneqarnissaat qulakkeerneqarpoq, maannakkullu inuit qulit aallartereerput. Suliniutit pingaarnertut anguniagassarivaat inuusuttut aalajangersimasumik suliffeqalernissaat imaluunniit ilinniakkamik aallartitaqarnissaat, aammattaaq inuusuttut namminneq suliffimmik pilersitsisinnaanerannut tapersersorneqarnissaat anguniarneqartoq, allassimavoq.

Inuusuttunut iluaqutaasasoq

Suliniut inuusuttunut tamanut, suliffeqanngitsutut nalunaarsorneqarsimasunut, 16-30-nut ukiulinnut sammitinneqarpoq. Taamaattorli inuusuttut atugarliortut innersuussinissamut atatillugu salliunneqassapput, taannalu Majoriap isumagissavaa.

- Siunissaq ungasinnerusoq isigalugu suliniuteqarneq pissutigalugu, inuusuttut suliffeqarfimmik aallartitsisinnaanerat periarfissaqarnerulissaaq taannalu siunissami tapiiffigineqarani nammineq ingerlassaaq, sulinummi Siu-Tsiu-mi aqutsisoq Nivikka Witjes oqarpoq.

Powered by Labrador CMS