Skip to main content

Sermersooq taarsigassarsiniassaaq - erniallu qaffassimallutik

Kommunalbestyrelsip 1,25 milliarder koruuninik taarsigassarsiniarnissamik pilersaarut ataasinngornermi akuersissutigaa.

Kommunalbestyrelsi immikkut ittumik ataatsimiimmat kommunip illoqarfimmik ineriartortitseqatigiiffiutaata Siorarsiorfik Nuuk City Development A/S-ip (NCD) sanaartortitaanik tigusinissaq siunertaralugu 1,25 milliarder koruuninik taarsigassarsisinnaanermut periarfissanik misissuisoqarnissaanut pilersaarut amerlanerussuteqartunit akuerineqarpoq.

Kommunip ingerlatsivianit allakkiami atuarneqarsinnaavoq, erniat qaffakkiartornerat pissutigalugu aningaasarpassuarnik taarsigassarsiniarnissaq ajuusaarnartoq. Kommunimili politikkerit iliuuseqartariaqarput, NCD akiliisinnaajunnaalersutut nalilerneqarsimammat.

Inuit Ataqatigiit, Naleraq Demokraatillu pilersaarut NCD-p namminersortutut ingerlatseqatigiiffiujunnaartinneqarnissaanik aamma imaqartoq akuersissutigaat.

NCD-p inissiaatai 1.000-it missaanniittut Iserimmut tunniunneqassapput, kommunillu sanaartukkat 1,1 milliarder koruunit missaannik nalillit tigussavai. Ingerlatseqatigiiffimmik aqutsisut, tassa pisortaaneq pisortaanerullu tullia soraarnikuupput, maanna ingerlatseqatigiiffimmi siulersuisut aamma taamaatillutik.

Missingersuutit iluini akilersorneqarsinnaasut

Allakkiami NCD-p ajornartorsiutai erseqqinnerusumik allaaserineqarput, soorlu aamma aningaasarpassuarnik taarsigassarsinerup aningaasaqarnermut kingunerisassai allaaserineqartut.

Allakkiaq naapertorlugu, 3,5 procentimik erniallit 1,1 milliarder koruunit taarsigassarsiarineqartussat (1,25 milliarder koruuninik taarsigassarsinissamik pisariaqartitsinermik annikinnerulaartut) ukiumut 67 millioner koruuninik akilerneqartassapput.

Aningaasat sumut atorneqarnissaannut takussutissaq.
Kommuneqarfik Sermersooq

Taarsigassarsianut ukiumut akiliuteqartarniartut kommunip 2024-imiit missingersuutaasa iluiniittussaapput, taakku NCD-p attartornermi ineqarnermut akiliutigeqqusimasaasa 74 millioner koruuniusimapput- 

Erniat qaffakkiartorneri miliuunilikkaanik nalillit

Allakkiaq naapertorlugu erniat qaffakkiartornerisa aningaasaqarneq tatisussaavaat:

- Nunarsuarmi aningaasanik niuerfinni erniat qaffakkiartupiloorput, tak. nationalbankip erniarititaasa qaffakkiartornerat, tamatumalu kinguneranik danskit realkredit aqqutigalugu aningaasaliissuteqartarfiisa erniaat piffissap sivikitsunnguup ingerlanerani 0.5%-imiit 3,5%-imut qaffassimapput, taamaalilluni ernianut aningaasartuutigineqartartut qaffariapiloorlutik.

Oqaatigineqarsimavoq, Nuummi atuarfiliornissamut 2019-imi taarsigassarsiat nalikillinnginnissaat isumannaarneqarsimasuuppat, kommuni ukiut 30-t ingerlaneranni 300 millioner koruunit missaannik sipaaruteqarsimassagaluartoq:

- Tassa Nykreditimut 450 millioner koruuninik taarsigassarsiat erniaasa nalingisalu isumannaarneqarsimannginnerisa malitsigisaanik, ukiumut immikkut 10 millioner koruuninik akiliuteqartoqartassaaq, taakkulu ukiut 30-t ingerlaneranni 300 millioner koruuninik naleqassallutik, allakkiami allassimavoq.

Siumut naatsorsuusioqqusisoq

Kommunalbestyrelsimi Siumut sinnerlugu ilaasortat pilersaarummut akuerserusunngillat, arlalinnik nangaanartoqartitsigamik aamma pilersaarutip unitsikkallarneqarnissaa kissaatigigamikku.

Oqaaseqartartup Inga Dora. G. Markussenip (S) ilaatigut piumasarisimavaa, suliamut atatillugu uppernarsaatit allat saqqummiunneqassasut. Aalajangiinermut ilanngussat ilaat tamanit pissarsiarineqarsinnaanngillat - kommuni naapertorlugu allagaatinik atinik allassimasoqarnera pissutigalugu.

Siumumi politikkerip aamma kissaatigisimavaa, NCD-mut atatillugu maajip 23-at ilanngullugu naatsorsuusiortoqassasoq, tassani ingerlatseqatigiiffiup aningaasanik atuisimanera tamakkiisumik takuneqarsinnaanngorlugu. Ingerlatsiviup siunnersuutaa naapertorlugu, NCD ukioq manna januaarip aallaqqaataaniit Iserimmut pisortatigoortumik kattunneqarsimavoq.

Pisortaanerusimasoq nipangiussimasussaatitaasoq

Inga Dora G. Markussenip tamatuma saniatigut NCD-mi aqutsisut sooq tunuarsimanersut pillugit kommunalbestyrelsimit erseqqissumik akineqarsinnaannginnini naammaginngilaa.

Sermitsiaq.AG-mit NCD-mi pisortaanerusimasoq Jens B. Frederiksen attavigineqarsimavoq.

Taassuma oqaatigisimavaa, NCD-p inissisimanera pillugu oqaaseqarsinnaanani, NCD-mut isumaqatigiissutigisimagamiuk pissutsit pillugit oqaaseqannginnissani.

OQALLIFFIMMUT TIKILLUARIT
  • Oqallinneq malinnaaffigalugulu peqataaffigerusukkukku cookies akuerissavat: ”accepter cookies”.
  • Pingaarutilik! Malittarisassat nutaat: oqallinneq malinnaavigiumallugu peqataaffigiumallugulu https://www.facebook.com/settings/cookie ataani Valgfrie cookies atuuttussanngortinneqassaaq.
  • Oqaaseqaatit allaffissartaat browserinni aamma mattunneqarsinnaavoq. Browserinni Facebookimi oqaaseqaatinut allaffissat atuutilersinnissaannut ilitsersuut uani atuarsinnaavat.
  • Sermitsiaq.AG atuartartutta akornanni isumaqatigiinngittoqaraluarpalluunniit oqalliseriaatsip pitsaasuunissaanik kissaateqarpoq. Oqallinnermut malittarisassanik unioqqutitsineq mattunneqarnermik kinguneqarsinnaavoq.
  • Oqaaseqaatinik sakkortuunik nalunaarutiginninneq pisinnaavoq "rapporter" toorlugu imaluunniit ”markere som spam” toorlugu.

Forsiden lige nu

SENESTE NYHEDER