Sermersooq suli kommunimi pisortassarsiorpoq

Kommuneqarfik Sermersuumi atorfinitsitsiniarnermik ataatsimiititaliaata kissaatigisimavaa, amerlanerusunik qinigassaqarnissani. Atorfik inuttassarsiuuteqqinneqarpoq.

Illoqarfiit pingaarnersaata kommunia, kommunimi pisortaasimasup Lars Møller Sørensenip kommunimik isumaqatigiissuteqarluni juulip qaammataani atorfimminit soraartup paarlatsissaanik suli nassaarsimanngilaq.

Lars Møller Sørensenip kommunillu kiisalu sanarfinermut avatangiisinullu ingerlatsivimmi pisortaasimasup Hans Henrik Winter Johansenip soraarnissaq pillugu isumaqatigiissuteqarsimaneq pillugu nalunaaruteqarnermi soraarneranut suna tunngaviunersoq ilisimatitsissuginngilaat.

Kommunip atorfinitsitsiniarnermi ataatsimiititaliaani, kommunimi pisortaagallartumik Marie Fleischerimit aqunneqartup kissaatigisimavaa ”amerlanerusunik toqqagassaqartoqarnisaa”. Taamaammat Sermersuup Kommuniani pisortatut atorfik allagarsiuteqqinneqarsimavoq. Kommuni nittartakkamigut taamatut ilisimatitsissuteqarpoq.

Vigtigt valg

- Allaffissornermi siuttussamik toqqaanissaq pingaaruteqartupilussuuvoq, taamaammat tulluartumik toqqaanissatsinnut amerlanernik toqqagassaqarnissarput pingaaruteqarpoq, borgmester Charlotte Ludvigsen (IA) kommunip nittartagaatigut oqarpoq.

Atorfimmik inuttassarsiuinermik allagaq malillugu kommunimi pisortassaq inussiarnerlunilu tatigeqatigiisitsisinnaassaaq, erseqqissumik toqqissisimanertumillu aaqqissuussaanerup iluani pilersitsissaaq. Pineqartoq aaqqissuussaaneq politikkikkut aqunneqartumi aqutsinermik misilittagaqarsinnaavoq aamma isummat assigiinngitsorpassuit akornanni aaqqiissutissamik pitsaanerpaamik nassaarsiorsinnaanermik aqutsisinnaassalluni.

Sanarfinermut avatangiisinullu ingerlatsivimmi pisortatut atorfik kingusinnerusukkut inuttassarsiuunneqassaaq, kommunimi pisortaq nutaaq pisortassamik nutaanik atorfinitsitsinissamut peqataasussaammat.

Powered by Labrador CMS