Sermersooq naalakkersuisoqarfimmit uparuarneqartoq

Kommuneqarfik Sermersooq Aningaasaqarnermut Naalakkersuisoqarfimmit isornartorsiorneqarpoq, attartornissamik isumaqatigiissutit arlallit, kommunimit pilersinneqarsimasut, Naalakkersuisunit akuerineqartussanngorlugit nassiunneqarsimanngimmata.

Taama kommuni nittartakkamini paasissutissiivoq.

2018-imi missingersuusiortarnermut inatsimmik nutaamik pilersitsisoqarpoq, tassanilu peqqussutigineqarpoq, attartornissamik isumaqatigiissutit tamarmik, suli pilersinneqannginnerini, kommuninit Naalakkersuisunut akuersissutigitinneqartassasut. Tamatumunnga ilaatigut pissutaavoq, attartornissamik isumaqatigiissutit pisut ilaanni akiitsut sanilliunneqarsinnaammata.

Attartornissamut isumaqatigiissutit 24-t

Kommuni paasissutissiivoq suliaq makkununnga tunngassuteqartoq:

• Sanaartornermi maskiinanik attartornermut isumaqatigiissutit qulit
• Printerinik attartornermut isumaqatigiissutit qulit
• Inuussutissarsiornermi ininik allaffeqarfinnik attartornermut isumaqatigiissutit sisamat

Suliat Kommuneqarfik Sermersuup Aningaasaqarnermut Naalakkersuisoqarfimmit uparuarneqarneranik kinguneqarsimapput, naalakkersuisoqarfimmillu suliat Nakkutilliisoqarfimmut tunniunneqarluni, kommuni nittartakkamini allappoq. Nakkutilliisoqarfik kommunalbestyrelsit aqutsinerminni inatsisinik malinninnerannik nakkutilliisartuuvoq.

Suliat ilaannut assersuutitut kommunimit gummigedi nutaaq Nuummi aputaajaanermut 2019-imi attartorneqartoq oqaatigineqarpoq:

Kommunaldirektørip isumaqatigiissutit illersorai

- Maskiina nutaajugami 1,2 millioner koruuninik akeqarpoq, tassungali taarsiullugu ingerlatsivik aalajangerpoq, sivikinnerpaamik ukiuni marlunni qaammammut 20.338 koruuninik akiliisarluni attartorniarlugu. Kommunip gummiged qaquguluunniit attartornermut aningaasartuutit ilanngaatigalugit pisiarisinnaavaa, kommuni allappoq.

Sermitsiaq.AG suliami immikkuualuttut paasisaqarfiginerunissaannik sulissuteqarpoq.

Kommunaldirektørip Ole Jakobsenip isumaqatigiissutit pilersinneqarsimasut illersorpai isumatusaartuunerarlugillu:

- Isumaqatigiissutaapput ingerlatsivinni ataasiakkaani pilersinneqarsimasut, taakkualu kommunimut aningaasaqarnikkut isumatusaartuupput, kisianni pisortani oqartussatut inatsisinik atuuttunik soorunami malinnittussaavugut. Taamaattumik siunissami isumaqatigiissutissanik akuerisassanngorlugit tamatigut nassiussisassaagut, Ole Jakobsen oqarpoq.

Qisuariarneq sakkortuneraraa

Kommunaldirektøri tamatuma saniatigut kaammattuivoq, naalakkersuisoqarfik isumaqatigiissutit sorliit akuerisassanngorlugit nassiunneqartussaanerinut nalinginnaasumik killiliiffiusumik pilersitseqqullugu:

- Missingersuusiortarnermut inatsimmi Aningaasaqarnermut Naalakkersuisoqarfiup nalunaarusiamik nalinginnaasumik killiliiffiusumik suliaqarsinnaanera periarfissinneqarpoq, tamannalu pilertornerpaamik pissasoq kaammattuutigaara.

- Aamma naalakkersuisoqarfimmit oqaatigineqarpoq, nalinginnaasumik killiliineq paasineqarsimasoq. Tassami ullumikkut inatsit ima sukkannertigaaq, inimik ataatsimiiffissamik biilinilluunniit ullormi ataasiinnarmi unioqqutitsinata attartorsinnaanata. Maleruagassanik unioqqutitsisimanerput ilumoorpoq, kisiannili inatsisit taama isikkoqartillugit naalakkersuisoqarfik taama sakkortutigisumik qisuariarmat eqqumiigaara, Ole Jakobsen oqarpoq.

Kommuni nangilluni paasissutissiivoq, Aningaasaqarnermut Naalakkersuisoqarfimmit uparuaaneq Aningaasaqarnermut Inuussutissarsiornermullu Ataatsimiititaliap ataatsimiinnerani decembarip 15-iani saqqummiunneqassasoq.

Nakkutilliisoqarfimmi suliaq suli alla

Kommuneqarfik Sermersooq pillugu ukiuni kingullerni aalassassimaartoqarsimavoq, kommunilu ingerlatsinermini naapertuutinngitsunik arlalinnik saqqummersoqareersorlu torersaangaatsiarsimalluni.

Kommuni ukiut arlallit ingerlaneranni Namminersorlutik Oqartussat Kommuninik Nakkutilliineranni kommunip aningaasaliisartunit namminersortunit inissianik attartornera, kommunimit sulisunut innuttaasunullu Nuummi inissarsiorlutik utaqqisuniittunut attartorteqqittarsimasai, pillugu aaqqiagiinngissuteqarsimavoq. Nakkutilliisoqarfiup naggataatigut periaaseq tamanna kommuninut piginnaatitsissutit avataanniittutut inerniliissutigaa, kommunillu suleriaatsimik tamatuminnga taamaatitsinissaa piumasaralugu.

Kommuni tamatuma saniatigut illoqarfimmik ineriartortitsinermut ingerlatseqatigiiffimmi NCD-mi, aningaasaliinerit suliluunniit inissinneqanngitsut sanaartukkanik arlalinnik aallartitsiviusimasumi naammassinniffiusimasumilu, aningaasaqarnikkut paatsiveqanngitsumik ingerlatsisoqarsimaneranik saliinissamut 1,25 milliarder koruuninik taarsigassarsisinnaanissaminut akuerineqarumalluni sakkortuumik sulissuteqarpoq.