kommunit
Sermersooq millioninik marlunnik kisitsisitalinnik sinneqartoorpoq
Kommuneqarfik Sermersooq siorna ilimagisamit pitsaanerusumik angusaqarpoq. Borgmesteri Asii Chemnitz Narup (IA), naatsorsuutit 'naammaginarluinnartuusut isumqarpoq
23,5 millionit koruunit.
Kommuneqarfik Sermersuup ukiumi 2015-imi naatsorsuiffiusumi taamatut sinneqartooruteqarpoq. Angusaq ilimagisamit 3 millionit koruuninik pitsaaneruvoq, illoqarfiit annersaannilu kommunip taamaalilluni ajortumik ineriartorneq, kommunit pingasut assigalugit mumisippaa.
Tupaallaataanngitsumik borgmesterip Asii Chemnitz Narupip (IA) tamanna nuannaarutigaa.
- 2014-imi aalajangiinivut imaannaanngitsut maannakkut pitsaasumik sunniuteqartut takullugit nuannaarutigaarput. Pisariaqarsimapput kommunimilu ineriartortitsinissamut tikkuussisimallutik, tusagassiuutinut nalunaarummi allappoq.
Atuaruk: Atuarfiit ineriartortinnissaannut pilersaarut nutaaq borgmesterip tatigaa
Suliffissaaleqisut ikiliartorput
Naatsorsuutit naammaginarluinnartut. Pingaartumik eqqarsaatigalugu, missingersuutit akuersissutigineqanngitsiarnerini kommuninut allanut naligiissaarinikkut saniatigut 25 millionit koruuninik akiliinissamut Kommuneqarfik Sermersooq pisussaaffilerneqartoq, taanna isumaqarpoq.
Atuaruk: Siunnersuut assortuussutaasoq Asiip peerusuppaa
Kommuunip aningaasanik atoriaannarnik uninngasuutai 2013-imi ima annikitsigipput, kommuni Namminersorlutik Oqartussanit sukannersumik nakkutigineqalerluni, 2015-ip naalernerani 101 millionit koruuniupput, tamannalu Kommunip kaaviiaartitat 6 procentiunissaanik piumasaqaammit annertunerulluni.
Taassuma saniatigut ilisimatitsissutigineqarpoq, kommuni ukioq 2015-imi akileraarutitigut isertitatigut pitsaasumik sunniuteqartoqarsimanera malugaa, ilaatigut Nuummut nuttartut suliffissaaleqinerullu appariarnerata kingunerisaanik. Suliffissaaleqisut ikileriarnerisa aamma kinguneraa, pisortanit ikiorsiissutit suliffeerunnermilu tapiissutit pillugit aningaasartuutit appariarmata.
Atuaruk: Illoqarfiit pingaarnersaannut periusissaq nutaaq