Sermersooq Kunngissap arpartitsisarneratut arpatitsisalissanerluni eqqarsaatersuuteqarpoq

Royal Run Kalaallit Nunaanni ingerlanneqartalissappat nammineerlutik aaqqissuisartussanik pisariaqartitsisoqarpoq. Kommuneqarfik Sermersooq tamassumunnga eqqarsaatersuuteqalereerpoq.

Kunngissaq Frederik siorna akunnaatsuliilluni inuuissiornerminut atatillugu danskit illoqarfiini annerni tallimaasuni Royal Runimik taallugu arpaqataavoq.

Ukiut 51-it akunnaatsuunngillat, kunngissalli timersorumatussusaannut tamanna unitsitsinngilaq. Kunngikkormiut sapaatip akunnerani matumani nalunaarput ukioq manna aamma Royal Runimik arpatsitsisoqaqqissasoq, juunip qulingat, tassa pinsep ulluisa aappaat, ulluliunneqarluni. Kunngissarlu ukioq manna Aalborgimi, Aarhusimi, Københavnimi, Bornholmimi Savalimmiunilu Klaksvigimi arpaqataassaaq.

Klaksvigimili allaanerulaartumik pisoqassaaq, tassa ulloq arpaffissaasoq allaagami. Kalaallit Nunaat pilersaarutinut ilaatinneqanngilaq, ungasippallaarnera pissutigalugu. Aaqqissuisulli neriuutigaat ukioq manna Kalaallit Nunaanni Royal Runimik arpatsitsisoqaqqissasoq.

Kommuneqarfik Sermersooq Nuummi siorna Royal Runimik arpatsitsivoq, ukioq mannalu Royal Runeqarnissaanut nalunaartoqareermat aammaarluni aaqqissuusseqqissanerluni eqqarsaatersuuteqarpoq.

Royal Runip ukioq manna nammineerluni aaqqissuussinissaq ajornannginnerutippaa. Sumiiffiit arpaqataatitsisussat atortussanik nassinneqarumaarput. Taamaammat imaassinnaasoq sinerissami illoqarfinni allani arpakkumatuut Kunngissap arpaffiani ullormi arpaqataarusulissasut.

Powered by Labrador CMS