kommunit
Sermersooq Kanukokamut: Qujanaq isumassuinissinnut - uagut sapinngilagut
Kommuneqarfiit kattuffiat kommunimut noqqaassuteqareersorlu Kommuneqarfik Sermersooq Kanukokamut ilaasortaajunnaarnissamik aalajangiusimanninnerminik nalunaaruteqarpoq
Kommuneqarfik Sermersuup Kanukokap ilaasortaajunnaarnissamik ernummateqarnera isumaqatiginngilaa. Taama nalunaartoqarpoq kommuneqarfiit kattuffiat Sermersuumut naggataamik kaammattuuteqareersorlu.
Atuaruk: Kanukokap Sermersooq qinnuigaa: Kalaalllit Nunaanni ataatsimooqatigiinnermit aninak
- Maannakkut KANUKOKA-mi kommunitsinni innuttaasut ernumassutigineqarnerat nuannerpoq. Tamanna siusinnerusukkut pisimagaluarpat pissutsinut taamatut ittunut pisimassanngikkaluarpugut. Kisianni eqqortoq tassaavoq 2013-imi borgmesterit pingasuullutik arajutsisilluta ataatsimoortumik tapiissutit agguataarneqarnissaat pillugit Naalakkersuisunut saaffiginnimmata suleqatigiinnermit peersitaavugut, Sermersuup borgmesteria Asii Chemnitz Narup oqarpoq.
Ilaasortanngoqqissanngitsoq
Borgmesterip tamatuma peqatigisaanik kommumini Kanukokamut ilaasortanngoqqinnissaa tusagassiuutitigut nalunaarutikkut ilumuunnginnerarpaa.
Kommuneqarfik Sermersooq erseqqissaavoq, Kommuneqarfik Sermersooq ilaasortaajunnaarniarluni nalunaarmalli KANUKOKA-mi aaqqissuussaaneq allanngortillugu isumaqatigiilluni ataatsimut aalajangiisoqartalerpat ilaasortaajunnaarnissaq kommunimi eqqarsaatigeqqinneqassasoq KANUKOKA-mut nalunaarutigineqartarsimasoq.
- Soqutigisarinngisatsinnik aalajangernerit pinngitsaaliissummik tapersersortussanngorlugit inisseqqinnianngilagut. Tamanna KANUKOKA-mut arlaleriaqaluta oqaatigisarparput, kisianni tusarneqarsimagunanngilagut, borgmesteri oqarpoq.
Ajornartorsiutaanavianngitsoq
Kommuneqarfiit kattuffiata siulittaasuata Palle Jeremiassenip tusagassiuutinut nalunaarummini Kommuneqarfik Sermersooq ilaasortaajunnaaraluarpat immikkoortut arlallit ajoqutaasussat taakkartorpai.
- Ilaasortaajunnaarutta ajornartorsiutivut annertunerulernavianngillat. Pisortatigoortumik suliassaqarfinni arlalinni sunniuteqarsinnaanerput annaassagipput ilumoorpoq. Eqqortoq unaagunarpoq; Palle Jeremiassenip ukiut tamaasa KANUKOKA-mut akiliutigisartakkavut 4,2 millioner koruunit innuttaasutta ajunngitsumik inuunissaaninngarnit ernumassutiginerugunarai, Asii Chemnitz Narup oqarpoq.
Kommuneqarfik Sermersuumi kommunalbestyrelsi siorna aalajangerpoq, kommuni Kanukokamit 1. januar 2016-imiit atuutilersumik ilaasortaajunnaassasoq.
Aamma atuaruk: Sermersooq Kanukokamut ilaasortaajunnaarpoq