Sermersooq Kanukokami ilaasortaajunnaarpoq

Kommuneqarfik Sermersooq kommunit kattuffiannit Kanukokamit 2016-mi januaarip aallaqqaataat aallarnerfigalugu ilaasortaajunnaassaaq.

Kommunalbestyrelsimi amerlanerussuteqartut tamanna aalajangerpaat.

Taasititsisoqalernerani illuatungiliuttut Siumut aamma Atassut ataatsimiittarfimmit anipput. Taasinermi ilaasortaasunit 19-init qulit taaseqataapput.

Tamat oqartussaaqataanerat
Inuit Ataqatigiinni kommunalbestyrelsimi ilaasortap Mille Søvndahl Pedersenip ulloq tamat oqartussaaqataanerannik innarliisoq oqaatigaa.

- Siunnersuuteqartup oqaatigaa ilaasortaaneq sumilluunniit iluaquteqarsimanngitsoq ukiuni kingullerni, taamaasilluni aamma ilaasortaanermut akiliisarneq annertuallaartoq naak iluaqutertaqanngikkaluartoq.

- Siumup Atassutillu ilaasortaaginnartoqarnissaa kissaatigaat. Ataasiinnannguamilluunniit oqaatigisinnaanngilaat suut iluaqutaanersut. Oqaatigaat Kanukoka nutaamik pisortartaaqqammertoq, taannalu suleqatiginissaa periarfissinneqartariaqartoq. Kanukokali ukiorpassuarni periarfissinneqartuaannarnikuuvoq, Mille Søvndahl Pedersen oqaaseqaateqarpoq.

Aalajangiinissamut taasisoqalernerani Siumut Atassutillu anianerat iluarinngilaa.

- Nalunngilarput akerlerineqartut amerlanerussuteqaraangata akueriuminaattartoq. Piumasat pineqanngikkaangata isumaqataanarneq ajorpoq. Tamanna meeqqat nalunngilaat - meeqqat qanoq periuseqartarnersut nalunngilarput. Innuttaasunilli qinigaat oqallinneranni aniinnartoqarpoq. Politikkeritut suliassat qimarratigiinnarneqarput. Taamaasiorneq kikkut tamat oqartussaanerannut qinersisartunullu mitalliineruvoq. Neriuppunga tamanna misigeqqissanagu, Mille Søvndahl Pedersen oqarpoq.

Kommunalbestyrelsimi Siumup siulittaasua Martha Abelsen pisoq pillugu oqaaseqarsinnaanngilaq Kanukokami siulittaasuunini pissutigalugu.

Kalaallit Nunaanni Kommunit Kattuffiat Kanukoka naalisagaavoq, taanna 1972-mi pilersinneqarpoq, kommunit taamani 18-iusut ataatsimut kattuffittaaralugu.