aningaasaqarneq

Sermersooq ilungersunartorsioreerluni: Million koruuninik arlalinnik sinneqartoorut saqqummiunneqarpoq

Kommuneqarfik Sermersooq missingersuussassatut naatsorsuutigineqartumit pitsaanerusumik 2014-mi angusani saqqummiuppai

Borgmesteri Asii Chemnitz Narup aamma kommunimi pisortaaneq Steffen Ulrich-Lynge - assi toqqorsivimmit

Kommuneqarfik Sermersooq ukiuni kingullerni aningaasaqarnikkut ajornartorsiuteqareerluni missingersuutitigut angusani pitsaasut saqqummiuppai.

Sermersuumi kommunalbestyrelsimi ilaasortaasut aningaasanik missingersuut 2014-moortoq saqqummiunniarlugu aalajangerpaa.

Naatsorsuutit kukkunersiorneqanngitsut takutippaat kommuni ukioq kingulleq 28 million koruuninik sinneqartoortoq. Tamanna missingersuutaaqqaarsimasunit 3 million koruuniusunit pitsanngoriaataangaatsiarpoq.

Naak Kommuneqarfik Sermersooq 2014-imi 2013-imut sanilliullugu sanaartornermut 50 million koruuninik atuinerusimagaluartoq – 2014-imi sanaartornermut aningaasaliissutit 170 million koruuniusimapput, Kommuneqarfik Sermersuumi borgmesteri Inuit Ataqatigiinnit Asii Chemnitz Narup ilisimatitsivoq.

Aningaasartuutikinneruneq
Peqqutaasulli annerpaartaat tassaavoq, 2014-ip ingerlanerani arlalitsigut aningaasatigut ingerlatsinerup sukateriffigineqarsimanera.

Ilaatigut pisiniarnerit 10.000 koruunit sinnersimappagit qullersaanermit 2014-imi qaammatini kingullerni akuerineqaqqaartarsimanerat aningaasartuutikinnerungaatsiarnermik kinguneqarpoq.

- Ukioq kingulleq Kommuneqarfik Sermersuumut ilungersunarsimaqaaq, aalajangiinerit amerlasuut ilungersunartullu ingerlattariaqarsimavagut. Tamannalu kinguneqarluarmat qujamasuutigeqaarput, nuannaarutigaarpullu aningaasaqarnitta ilorraap tungaanut ingerlallualersimanera, Asii Chemnitz Narup tusagassiutinut nalunaarummi oqarpoq.

Kommunalbestyrelsi naammagisimaarinnippoq
Ukioq manna ukiumut naatsorsuutit ilusaat allanngortinneqarsimavoq.

Aatsaavissuaq naatsorsuutinut paasissutissat quppersakkamut ataatsimoortinneqarsimapput assiliartalersorneqarlutik nassuiaasersorneqarlutillu. Tamakkua tamarmik naatsorsuutit paasiuminarnerulersippaat.

Kommunalbestyrelsimit isumaqatigiissumit naatsorsuutit 'nuannaarutigilluinnarneqarput'.

Kommuneqarfik Sermersuup 2014-mut missingersuutai talerpiata tungaani pdf-inngorlugit aaneqarsinnaapput

Powered by Labrador CMS