aatsitassanik katersugaasivik nutaaq

Sermersooq amerlanerusunik katersugaasivittaarniarpoq

Illoqarfiit pingaarnersaata kommuneqarfiata sumiiffimmi oqaluttuarisaanermut katersugaasivik nutaaq qanittukkut ammassavaa. Tamanna peqatigalugu aatsitassanut katersugaasivissap inissaanik ujarlertoqarpoq

Soraarninngornikup Bjarne Ljungdahlip ukiuni pingasuni kinguneqanngitsumik Kommuneqarfik Sermersuumik ataatsimeeqateqaqattaartareersimalluni nunap aatsitassanut katersugaasiveqalernissaa suli sinnattoraa.

Qeqqata Kommuniani aningaasaqarnermut pisortaq Laust Løgstrup oqaluttuarpoq ilaatigut Aatsitassarsiornermut Ilinniarfik, KTI aamma DTU Artek suleqatigalugit katersugaasivissap inissaanik ujarlilersimallutik.

Isumaqarpit suliniutip taama annertutigisup inissaanik nassaarsinnaassallusi?

– Aap isumaqarpunga sapissanngikkipput. Oqarama ´uagut´ pinngilara uagut kommunimi, pivarali ´uagut´ illoqarfimmi, pisortaq Sermitsiaq.AG-mut allappoq.

Pilersaarutit pissanganartut

Nuummi suli tunuarsimaartoqarneruvoq Bjarne Ljungdahlillu isumassarsiaa suli nunap aatsitassanik katersugaasiviatut taagornagu, taaginnarluguli ´Ivittunit katersat´.

Kommunili neriorsuivoq ujarassiooq soraarninngornikoq utaqqisippallaarunnaassallugu.

– Isumaqarluinnarpunga Bjarne Ljungdahlip pilersaarutai soqutiginartuusut, Kommuneqarfik Sermersuumi kulturimut immikkoortoqarfimmi pisortaq Julie Lynge oqarpoq.

Katersugaasiviit ataasiakkaarlugit

– Suliniummut aningaasat inissallu kisimik killiliisinnaapput.

Kommuni ukioq manna katersugaasivinnut marlunnut aningaasaliissuteqarsimavoq, ilaatigut Ivittuunit orsugiassiorfimmit katersugarpassuit nanginneqaqqinnissaannut.

– Katersugaasiviit ataasiakkaarlugit pilersinniarpavut aningaasassaaleqineq pissutigalugu, maannalu Ljungdahlip suliniutaa aallartisassavarput, Julie Lynge neriorsuivoq, aasallu ingerlanerani katersugaasivik nutaaq, Nuup Oqaluttuassartaanut Katersugaasivik, ammarneqassaaq.

Ininik nassaarniarneq ajornakusoortoq

Illoqarfiup oqaluttuassartaanut katersugaasiveqalernissaq siullermik 2009-mi siunnersuutigineqarpoq.

Ivittuunut katersugaasivimmik 400 m2-nik angissusilimmik pilersitsinissaq piviusorpalaarpa?

– Maani Nuummi inissarsiornikkut unammilligassaqarpugut, tamanna isertuunneqanngilaq. Manna tikillugu katersugaasivimmut inissamik naammattumik angissusilimmik nassaarsinnaasimanngilagut.

Katersat kommunip containeriini

Immikkoortoqarfimmi pisortaq nassuiaavoq kommuni aningaasaqarniarnikkut unammilligassaqarsimasoq, maannali aningaasaateqarnerulaalerami suliniutit allat misissorneqarsinnaalersut.

Nunatsinni piiaaffinnit assigiinngitsunit assinik, modellinik, ujaqqanik atortunillu katersat ukiut pingasut sinnerlugit Nuummi kommunip containeriini toqqortaatigineqarsimapput, tamakkua Ivittuunit Kangilinnguanillu tiguneqarnerisa kingorna.

Pisoqqanik qanoq isillusi toqqortaateqarnissinnik ernumanartoqartitsinera paasisinnaaviuk?

– Aap, tamanna paasisinnaalluarpara. .Sulinerput siunissami pissaaq Bjarne Ljungdahl qanimut suleqatigalugu, taassuma katersugaatit ilisimasaqarfigimmagit. Suliavut tamatta isumagisinnaassavagut.

Kulturikkut aalajangiinerunngilaq

Sermersooq pitsaasumik katersugaasiviliorsinnaanngippat katersugaatit allanut tunniukkusussinnaavisigit, assersuutigalugu Sisimiunut?

– Aaqqiissuteqartoqassaaq aamma Bjarne Ljungdahlip akuerisinnaasaanik, immaqalu katersugaasivik mikinerusinnaavoq, kommunip kulturimut pisorttaa Juile Lynge oqarpoq.

Powered by Labrador CMS