Seqernup qinnguaanit tigooraasunik misileraaneq iluatsilluartoq
Nukissiuuteqarnermut imermillu pilersuinermut immikkoortumut pilersaarummut atatillugu nunaqarfinni illoqarfinnilu mikinerusuni seqernup qinnguaanit tigooraasunik Nukissiorfiit misileraanerat iluatsilluarpoq.
1993-imili erngup nukinga eqqakkanillu ikuallaaviit atorlugit kallerup inneranik kiassarnermillu nukissiuuteqarneq Kalaallit Nunaanni illoqarfinni anginerusuni atorneqalerpoq. Nukissiuutinilli taamatut atuineq Kalaallit Nunaanni annertusiartuinnaraluartoq, Nukissiorfiit illoqarfinni nunaqarfinnilu nukissiorfiutaat solarimik suli annertoorujussuarmik atuisut, aviisi Sermitsiaq allappoq.
Illoqarfinnili mikinerusuni nunaqarfinnilu mingutsitsinngitsumik orsussamillu atuiffiunngitsumik 2030-p tungaanut nukissiuutinik pilersitsinissamut Nukissiuuteqarnermut imermillu pilersuinermut immikkoortumut pilersaarut Naalakkersuisut 2017-imi saqqummiuppaat. Anguniagassatulli pilersaarutigineqartut suli tamarmik anguneqanngikkaluartut, suliat manna tikillugu ingerlalluarput, tamannalu nunaqarfimmi Ikerasaarsunni 100-t missaannik inoqartumi, Kangaatsiamiillu 25 kilometerit missaannik kujasinnerusumiittumi, takussutissaqalereerpoq. Nukissiuuteqarnermut imermillu pilersuinermut immikkoortumut pilersaarummut atatillugu Nukissiorfiit siorna Ikerasaarsummi seqernup nukinganik tigooraasunik ikkussuipput, nukillu taakkunannga pilersinneqartoq batterinut, nunaqarfiup nukissiorfianut inissinneqarsimasunut, katersorneqartarpoq. Misileraanerlu maannakumut iluatsilluarpoq.
Sipaarut annertooq
Ikerasaarsummi seqernup nukinganik tigooraasut atorlugit nukissiornernerup siorna novemberimi aallartinnerata kingorna, nunaqarfimmi nukissiorfiup maskiinaasa solarimik atuinerat appariarujussuarpoq. Batterit 90 procenti tikillugu immereeraangata, nukissiorfimmi maskiinat namminneerlutik unittarput, batterillu atorlugit nunaqarfik tamarmi kallerup inneranik pilersorneqalertarpoq. Batterit imaat 30 procentimut apparaangat, nukissiorfiit maskiinai namminneerlutik aallartarput. Ikerasaarsummi nukissiorfimmi siorna aprilimi solari 6.810 literi atorneqarsimavoq, seqernulli qinnguaanik tigooraasut atulernerisa kingorna, ukioq manna aprilimi solari 4.921 literi atorneqarsimavoq, taamaalilluni solarimik atuineq apparingaatsiarsimalluni. Taamatut misileraaneq nunaqarfimmi innuttaasut iluarisimaaraat, nukissiorfimmilu maskiinat unikkaangata nunaqarfik nipaarulluinnartartoq, Ikerasaarsummi nukissiorfimmi ingerlatsisoq, Marius Filemonsen Sermitsiamut oqarpoq.
Aviisimi Sermitsiami allaaserisaq tamaat atuaruk. Aviisi uani pissarsiarisinnaavat: