Seqernup pulanera 10.000 meterinik qutsissusilimmit

Claus Andersen-Aagaard tallimanngornermi puigulertugassaanngitsumik misigisaqarpoq.

Atuaruk: Assit: Kangerlussuarmi seqerngup pulanera pissanganartoq

Atuaruk: Seqerngup pulani nuissaq ajoqqutaasut

Air Greenlandip timmisartorsuanit Kalaallit Nunaaliartumit tallimanngornermi seqernup pulanera 10.000 meterinik qutsissusilimmit misigaa. Matumanili oqaluttuarnera naapertorlugu seqernup taartuinnanngorneranik misigisaq arajutsingajalluinnarpaa:

- Københavnimiit ulluni pingasuni suliffinnut atatillugu angalareerlunga Nuummut angerlariartorpunga, siutequserlungalu atuakkamik atuarlunga. Igalaara saagusimavoq, saninnilu issiasoqarani, timmisartoq ulloq taanna ilaasoqarpallaanngimmat.

- Tassanngaannaq arnamit tuikkut toortarneqarpunga, inuillu timmisartup qeqqaneerrannerat takuara. Siutequtikka peerpakka, taannalu aperivoq igalaakkut silammut isiginnaarsinnaanerluni, Claus Andersen-Aagaard nassuiaavoq nangillunilu:

Seqinneq ersigunnaarpoq sunalu tamarmi taartuinnanngorluni
- Seqernup pulanissaata eqqartorneqartorujussuusimanera eqqaamatsiarpara, timmisartullu iluani paasissutissiivikkut takusinnaavara, Norsaq Shetlandip Qeqertaasa avannaanni kaaviiaartoq. Igalaavaqqat silammut itsuartorpugut silaterpullu taartuinnaavoq. Siusinaarnata sekundimmi qulit qaangiummata seqernup qaarmarnga ersigunnaariataarpoq, seqernullu nalaa ammalortumik qernertumik asserneqarluni.

10.000 meterinik qutsissusilimmi
Claus Andersen-Aagaard Sermitsiaq.AG-mut oqaluttuarpoq, misigisaq immikkuullarilluinnartuusoq, ilaasullu allat qisuariarnerisigut isumaqatigiinnertik takutinneqartoq:

- Ilaasoqatikka oqarpallattartut tusaasinnaavakka "Naj" aamma "Ih" aamma "Fantastisk!". Pisoq alutorsaatigilllutu eqqarsarpunga 10.000 meterinik qutsissusilimmit seqernup pulanera misigisinnaagakku tupinnarluinnartuusoq, taamami pisoqarnissaa piareersimaffiginngilluinnarakku. Tassanngaannaq qinngornerit inngianartut takkupput, seqinerlu diamantitut assammiutut qillaalasutut isikkoqalerluni, sivitsunngitsorlu seqineq tamakkiisumik qinngorneqaleqqilluni.

Puigunaatsoq
Seqernup pulanera 10.000 meterinik qutsissusilimmit misigereerlugu Claus Andersen-Aagaardip pisumut immikkuullarilluinnartumut takunnittooqataasimanini paasilerpaa.

- Qaangiuppoq, uterlungalu ingikkama eqqarsarlunga, pisoq arajutsisimassagaluarlugu ilaasoqatiga toortaasimanngikkaluarpat. Ilaasoqatikkalu inuunermi puigulertugassaanngitsumik misigisaqarpugut, naggasiivoq.