Seqernup anorillu nukingi erngup nukinganut ilapittuutaassapput
Siunissamili CO2-mik aniatitsinitta annikillisarnissaanut assartuineq unammilligassat annersaraat, Avatangiisinut Naalakkersuisoq Kalistat Lund (IA) oqarpoq.
Naalakkersuisoqatigiinnissamik isumaqatigiissut naapertorlugu Naalakkersuisut nukissaq mingutsitsinngitsoq atorniarpaat. Taamaattumik avatangiisinut Naalakkersuisoq Kalistat Lund aperaarput Naalakkersuisut tamatumani qanoq iliorniarnersut, CO2-millu aniatitsineq annikillisarniarlugu assartuineq qanoq iliuuseqarfiginiarneraat, aviisi Sermitsiaq allappoq.
Kalistat Lundip apeqqutivut allakkatigut akissuteqarfigai. Taamaattumik apeqqutinik nangitsisunik aperisinnaasimanngilagut, akissutitigulli takuneqarsinnaavoq Naalakkersuisut avatangiisitigut suut pingaarnerutinneraat.
Aammattaarli apeqqutit ilaat akineqanngillat.
– Nukissiorfiit suleqatigalugu nuna tamakkerlugu nukissap mingutsitsinngitsup atorneqarnerata annertusarnissaa Naalakkersuisunit samminiarparput, Kalistat Lund oqarpoq.
– Erngup nukinga nukissiornermi pingaarnersaavoq, illoqarfiilli nunaqarfiillu tamarmik erngup nukinganik atuinissamut periarfissaqanngillat. Taamaattumik Nukissiorfiit seqernup anorillu nukingisa atorneqarsinnaanerannut periarfissat misissorpai. Seqernup anorillu nukingisa tunisassiarineqarnerat erngup nukinganik tunisassiornermit akisunerupput. Taamaattumik erngup nukinga samminiarnersaavarput.
Sanaartornermut inatsit tusarniaavigineqarpoq
Aasianni/Qasigiannguani erngup nukinganik nukissiornissamut aammalu Nuup innaallagissamik pilersorneranut Utoqqarmiut Kangerluarsunnguanni erngup nukinganik nukissisorfiup allineqarnissaanut sanaartornermut inatsit tamanut ammasumik tusarniaavigineqaleqqammerpoq, Kalistat Lund paasissutissiivoq.
Allaaserisaq tamaat uani Sermitsiami atuaruk: