Seoulimi juulli ukiortaarlu
Lana Larsen juullimi ukiortaamilu Korea Kujallermiissaaq, juullimi ukiortaamilu ileqqunik nutaanik misigisaqarnissaminut qilanaarpoq.
Lana Larsen Ilulissaneersoq ukioq manna februaarimi Ilisimatusarfimmi nutserisutut oqalutsitullu bachelorinngorpoq. Ullumikkut EF International Language Campusimi Seoulimi, Korea Kujallermi, oqaatsit ilikkavinnissaat anguniarlugu Koreamiusut ilinniarpoq. Taassuma ilinniarnini Korea Kujallermi ilisimatusarfiit ilaannut qinnuteqarnissamut atorniarpaa, tassani tuluttut, Koreamiusut kalaallisullu oqaatsitigut professorinngornissani siunertaralugu. Taanna qaammatini marlunni Seoulimiippoq, juulimilu 2023-p tungaanut tassaniissaaq.
Korea Kujallermi juullimi ileqqut Kalaallit Nunaannit allaaneruallaanngillat. Kisianni allaanerulaartoqarpoq, assersuutigalugu nerisassanut, juullimut nipilersukkat aamma ullut immikkuullarissut Nunatsinni nalinginnaasumik nalliuttorsiutigineqartartut.
- Malugisanni siulliit ilagaat adventeqannginnerat. Nunatsinni sapaassuaq pingaartorujussuuvoq ullorissat illoqarfinnilu orpiit ikinneqartarlutik, juullerpaluttut nivinngarneqarlutik, kikkullu tamarmik tussiartunik juullerpaluttunillu tusarnaartarput, Lana Larsen oqaluttuarpoq.
Korea Kujallermi decembarip 25-anni juulli nalliuttorsiutigineqartarpoq, amerlanerillu ullormi tassani freertarput. Novembarip qiteqqunneranit juullerpaluttut saqqummerneqartarput, Koreamiullu juullisiutaannik tusarnaartoqartarluni. Lana Larsenip juullimi nerisassanik nerinissani qilanaaraa, aamma Korea Kujallermeersut juullimi ukiortaamilu ileqquisa misiginissaat qilanaaralugit.
- Kulturimut ataqqinninniarlunga ileqqut annertuumik misissorpakka. Ilaqutarsiakka ikinngutikkalu nunanit allanit amerlasuuneersut juullisioqatiginissai qilanaaraara.
Ileqqut allat
Nunatsinni amerlasuut juullimi qeerlutuumik imaluunniit tuttumik kajortitanik naatsiialinnik, miseralinnik aamma rødkålilinnik juullimi nerisarput, kisianni Korea Kujallemi 'bulgogi' nerisarpaat, nersussuaq siataq, nudlit naatsiianik tungusunnitsunik sanaajusut aamma kimchi, tassa qunguleq mamarsaasersugaq.
Korea Kujallermi pingaarutilimmik ileqqoqartoqarpoq ”Seollal”-imik taaneqartartoq. Ulloq immikkuullarissoq Koreamiut qaammatinut ullorsiutaanni ullormi siullermi nalliuttorsiutigineqartarpoq. Nalinginnaasumik nunat killiit ullorsiutaat malillugu januaarip aallartinnerani imaluunniit februaarip aallartinnerani nalliuttorsiutigineqartarpoq.
- Seollal ulluni arlalinni pisarpoq, ilaqutariit katerisimaartarput, Koreamiullu ileqqulersuutaat atortarpaat, ileqquusumik nerisassat nerineqarlutik, inuiaat pinnguaataannik pinnguarlutik ileqqunnillu allanik sammisaqartarlutik. Seollalip ullui ullormi sumi pinera apeqqutaalluni sivisussusaa aalajangerneqartarpoq, Lana Larsen oqaluttuarpoq.
Kisianni Koreamiut qaammatisiutaanni ullorsiummi pingaarnerpaaq taaneqartarpoq ”Sebae”, taanna ileqquusumik iliuusiuvoq ataqqinninnermik takutitsiffiusoq.
- Sebae iliuusiuvoq nunamut seeqqummerluni assaat nunamut tutsillugit sikineq. Inuusuttut utoqqartaminnut sikerujussuartarput ukiortaamilu pilluaqqusillutik. Sikerujussuarneq ileqquuseq ataqqinninnermik takutitsisarpoq.
- Nunatsinni juullernera arlaatigut maqaasissaviuk?
- Nunatsinni juullimi ilaquttat juullisioqatigineri maqaasissavara. Nammineq nuannersunik ileqqoqarpugut, taakku maqaasissavakka. Aput aamma maqaasivara. Aput nillertoq nalaffigalugu ullorissat imaluunniit arsarnerit unnuakkut sumiiffimmi eqqissisimasumi isiginnaartarneri maqaasiunnarnagit isumaqaraluarama. Tamanna maqaasilereerpara.
Allaaserisaq Sermitsiamit decembarip qulingiluaani saqqummiunneqarpoq, Tusagassiorfimmiillu juulleriartornerani kikkut tamarmik ulappunnerannik ukkatarinninnerup ilaatut netsikkut saqqummiunneqarluni.
