Arsaalluni GM
Semifinalimi unamminerit naligiiffiusussat
Angutit isikkammik arsaallutik pissartanngorniunneranni semifinalertoqalerpat, naammassinissap tungaanut tamaviaartoqassaaq
Nuummi isikkammik arsaalluni Nunatsinni pissartanngorniunnermi ullumi semifinalertoqareerpat apeqquterpassuit akineqassapput.
Semifinalimi siullermi Qeqertarsuup Tunuaneersut Nagdlunguak' Ilulissaneersut aamma G-44 Qeqertarsuarmeersut unammissapput.
Assit takukkit: Nagdlunguak isaatitsilluartoq
Qeqertarsuup Tunuarmiut unammersuarnerat
Iluliarmiut unamminerni aallarniutaasuni unammilluarput, tassani iligiit unamminerit tamaasa ajugaaffigaat. Taakkulu amerlasuut ilimaginngikkaluarpaat IT-79 nukittuut ukioq manna futsalimi pissartanngortut ajugaaffigissagaat. Nagdlunguup Nuummiut 5-0-imik ajugaaffigaat.
Taakku unammisassaat, G-44, ukiuni kingullerni GM-ertoqarnerani angusarissaartarput, tunniutiinnartannginnerminnillu ilisarisimaneqarlutik.
Atuaruk: Sungiusaasoq tipaatsuttoq: Maanna arsarnivimmik arsartoqarpoq
Siorna finalertut
Siornat pissartanngorniutivittuusut IT-79 aamma illoqarfimminni akeraat B-67 semifinalip aappaani unammersuassapput.
IT-79-ip tupaallannartumik Nagdlunguamut ajorsarnertik qaangersinnaagunikku, siorna pissartaasut unammillersinnaavaat.
Assit takukkit: Isertitsinerpassuit aamma ajugaaneq aalassatsitsisoq
Kisianni ukioq maanna B-67 futsalimi GM-ertoqarnerani pakatsisitsipput, taakku taamaallaat unammersuarnermi qulingiluaattut inissipput, unammisartullu akiniaanissamik tamaviaaruteqarput.
Nagdlunguak' aamma G-44 nalunaaqutaq 16.00 unammissapput, unamminerullu aappaa nalunaaqutaq 19.00 aallartissaaq.
Atuaruk: Iligiit uku semifinalimut piareerput