Assiliinermi unammisitsinermi ajugaasinnaasut qulit kingullerni assi torrallataanerpaavoq. 

Assi Elise Bruunimit assilisaavoq, Nuup Nuussuaani najugaqarluni, taannalu Sermitsiaq.AG-ip kunngikkunnik assileqateqarnermi unammisitsinermi ajugaasuulluni. 

Elise Bruunip kunngissaq Frederik Katuap eqqaani assileqatigaa, assilu tassa selfieusoq oqaatigineqarsinnaavoq, taamaammat unammisitsinermi ajugaanera qularutissaanngilaq. 

Elise Bruun taamaasilluni 1.000 koruuninik akissarsitinneqarpoq. 

- Kunngikkut nuannarisaraagit, imaluunniit sooruna kunngikkormiunik assileqateqartutit?

- Aap kunngikkormiut malinnaaffigissallugit nuannarisaraakka. Ernera Niclas selfiemik assiliisinniarlugu illoqarfimmiisikkaluarpara, iluatitsinngitsoorporli. Suliffinnit soraarama aasussaagaluarpaanga, isumaqatigiippugulli Nuuk Centerimi naapinniarluta. Aqqutaani Katuaq saneqqullugu paasivara kunngikkormiut saneqquttussaasut, taamaattumik utaqqilaariarlunga assi assilivara. 

- Assi qanoq nuannaritigaajuk?

- Nuannarisorujussuuara, kuultimik qalipaatilimmik sinaaqqusissavara angerlarsimaffitsinnilu nivinngassavara. 

- 1.000 koruunit sumut atussamaarpigit?

- Niclasi oqarpoq aningaasat avittariaqarigut. Soraaramami aanngilaanga, efterskolernissaminullu sikkilimik amigaateqarpoq. Taamaattumik affai pissagunarpai, oqarpoq. 

Sermitsiaq.AG-ip ajugaasoq pilluaqquaa!