Kunngikkormiut tikeraarnerat
Selfiemik unammisitsineq: Kunngikkormiunik assileqateqarneq
Atuaruk qanoq 1.000 koruuninik eqquisinnaanerlutit. Kunngissakkut tikeraarnerat qanoq malunnartinnerit assiliinermik unammisitsisoqarpoq
Kunngikkormiusut ataqqinassusillit Kalaallit Nunaannut tikeraarput juulip 31-anit aallartittumik. Tikeraarnerat Narsarsuarmi aallartippoq, tassani kunngikkormiut umiarsuaannut Dannebrogimut ikimmata. Nuuk kingulliullugu tikeraarfigissavaat.
Kunngissap ilaqutani peqatigalugit tikeraarnerannut atatillugu assiliinermik unammisitsinermi 1.000 koruunimik eqquinissamut periarfissaqarputit. Maleruagassat ajornanngitsuararsuupput.
Selfiemik imminut assiliguit (nammineq assiliguit) arlaatigullu kunngissakkut tikeraarnerannut tunngasumik tunuliaqutaqaruit unammisitsinermut peqataasinnaavutit. Assi redaktion@sermitsiaq.ag-imut nassiunneqassaaq, atit tamaat ilanngutissavat kiisalu assi sumi assilisaanersoq qangalu aamma assilineqarsimanersoq nalunaarutigissallugu.
Kunngissakkut tunuliaqutaralugit imminut assilisimaguit, angerlarsimaffinni erfalasunik tunuliaqutaqaruit imaluunniit suleqatitillu arlaannik kunngissakkut tikeraarnerannik tunngasumik assilisaqarsimaguit assi nassiutiinnassavat. Imaluunniit nammineq isumassarsiannik aamma assimik nassiussaqarsinnaavutit.
Assi kusanarnerpaaq aaqqissuisoqarfimmit toqqarneqassaaq, aamma assit nassiunneqarsimasut tamaasa sapaatip akunnerata tulliani saqqummiunneqassapput. Ajugaasoq nalunaarfigineqarumaarpoq.