Savalimmiut
Sea Shepherdimi ilaasortat akiligassitserujussuartut
Sea Shepherdimi ilaasortat tallimat aamma illersuiniaqatigiiffik, Savalimmiuni niisarnarniarneq ajoqusersoramikku niisarnarniarnermut inatsisip sukaterneqarnerata kingorna eqqartuussineq siullermi katillugu 250.000 koruuninik akiligassinneqarput
Sea Shepherdimi ilaasortat tallimat tallimanngormat aggustip arfineq-aappaanni katillugu 125.000 koruuninik akiligassinneqarput, Savalimmiuni eqqartuussiviup suliami niisarnarniarnermut ajoqusersuinermut tunngasumi aalajangiigami. Piniarnerit julip 24-ani pipput.
Taakkunani tigusarineqartut sisamat nunaqarfeeqqami Bømi Vágoyimiittumi niisarnarniarneq ajoqusersorpaat. Marlullu gummibådimiitillutik tigusarineqarput. Taakku 30.000 koruuninik akiligassinneqarput.
Allat marluk piniarneq ajoqusersorpaat, ungalulersugaq qaangeqqusaanngitsoq qaangerlugu ataatsimoortut silammut anisinniarsarigamikkit. Taakku 35.000 aamma 25.000 koruuninik akiligassinneqarput.
Atuaruk: Niisarnarniarnermik akornusersuisut marluk tigusarineqartut
Arsaarinninneq akiligassiinerlu
Unnummi tassani Sea Shepherdimi ilaasortaq alla, illoqarfiit pingaarnersaanni Thorshavnimi tigusarineqarpoq. Taanna 5.000 koruuninik akiligassinneqarpoq.
Tamatuma saniatigut illersuiniaqatigiiffik Sea Shepherd 75.000 koruuninik akiligassinneqarpoq. Gummibådi aamma radiomut atortut arsaarinnissutigineqarput, taakku ilanngullugit akiligassat tamakkerlugit 200.000 koruuniupput.
Atuaruk: Mailit 3.000-t kingorna: Maanna illersuisunngorpunga
Paarnaarussineq sivisunerusoq
Niisarnarniarnermut inatsisip sukaterneqarnerata kingorna eqqartuussineq siulliuvoq. Niisarnarniarneq ajoqusersoraanni, annerusumik akiligassiinermut aamma ukiut marluk tikillugit paarnaarussilluni pillaanermut siunnersuummut Savalimmiuni inatsisartut akuersillutik taasinikuupput.
Akiligassaq 25.-35.000 koruunit ulluni 14-ini paarnaarussaanertut naleqarpoq.
- Niisarnarniarnermut inatsisip siunertaraa, niisarnat neqaa inatsisit naapertorlugit atorneqarnissaata qulakkeernissaa. Niisarnarniarneq ajoqusersoraanni inunnik ulorianartorsiortitsisoqarsinnaavoq, lagmandskontor oqaaseqaammi allappoq.
Eqqartuussineq Østre Landsretsimut suliareqqitassanngorneqarpoq.
Aamma atuakkit:
Savalimmiormiut ikiortariaqarpavut
Savalimmiuni ullumi niisarnat 20-30-t pisarineqarput