Sea Shepherd ukioq manna Savalimmiunukassanngilaq

Sea Shepherd 2014-imi 2015-imilu Savalimmiuni kangerluit nunami nasiffinnit Savalimmiullu imartaa umiarsuarnik angallatinillu sukkasuulianik nakkutigisarsimavai. Avatangiisinik illersuiniaqatigiiffik naapertorlugu niisarnanik untritilinnik arlalinnik toqoraanissaq pinngitsoortissimavaat.

Illersuiniaqatigiiffilli isumaqaraluarluni iluaqutaalluarsimalluni, 2016-imi Savalimmiunukarnianngilaq.

– Umiarsuaativut 2016-imi Savalimmiunukartinnianngilagut. Umiarsuit sumiiffinni allani atorfissaqartinneqarput. Piffissanngorpoq piviusulersaarummik filmiliornissamut, aammalu qallunaat savalimmiullu takornariaqartitsisarneri eqqorniarlugu periusiornissanut, Paul Watson, Sea Shepherdimik pilersitsisoq, sisamanngormat januaarip 14-ianni tusagassiorfinnut nalunaarutikkut oqarpoq.

Paul Watsonip ilanngullugu oqaatigaa, Sea Shepherdip Savalimmiunut Danmarkimullu nunani tamalaani inatsisinik unioqqutitsisutut unnerluutiginninnissamut periarfissat misissorai.

Tugisarinninnerit annertuunillu akiliisitsinerit

Sea Shepherd siullermik Savalimmiuniippoq 1983-imi. Tamatuma kingorna arfineq-marloriarluni Savalimmiuniittarsimavoq. Pingaartumik 2014-imi 2015-imilu niisarnarniarnermik akornusersuinerit annertusimapput.

2014-imi nalilerneqarpoq inuit Sea Shepherdimeersut katillugit 400-t qaammatit 4-5-t ingerlaneranni sinnersaraallutik Savalimmiuniittarsimasut nakkutilliillutik. Sea Shepherdip inatsisinik unioqqutitsinissani soqutigisarsimanngilaa. Sea Shepherdimi ilaasortat niisarnarniarneq arlaleriarlutik unitsinniartarsimavaat.

Savalimmiuni inatsit sakkortusineqarpoq

Niisarnat sissamut ungoorneqaraangata angallatit sukkasuuliat atorlugit Sea Shepherdimeersut niisarnat savalimmiormiullu piniartut akornannut inissinniartarsimapput.

Tamanna pissutigalugu amerlasuut tigusarineqartarput angallatinillu arsaarinnittoqartarluni. Taamaattumik niisarnarniartarnitoqaq eqqissiviilliorfiusarsimavoq, sakkutuunillu imarsiortunut aammalu qallunaanit immikkut sungiusakkanit nakkutigineqartarsimalluni.

2015-imi niisarnanut inatsit sakkortusineqarpoq, tamannalu pissutigalugu ilaatigut anginerusunik akiliisitsisoqarsinnaallunilu ukiut marluk angullugit parnaarussisoqarsinnaalerpoq.

Suliassaq annertooq

Pisimasoq, tamatumani Sea Shepherdimi ilaasortat tallimat siorna aggustimi katillugit 125.000 koruuninik akigassinneqarlutik, suli qulaajarneqanngilaq. Pisimasumi tassanissaaq Seap Shepherd Savalimmiut Eqqartuussivianni aamma 75.000 koruuninik akiligassinneqarpoq.

Eqqartuussut Østre Landsretimut ingerlateqqinneqarpoq, tassanilu suli eqqartuussisoqanngilaq.

Januaarip 22-anni Stiching Sea Shepherd Global-imut Amsterdamimiittumut Savalimmiut Eqqartuussivianni nutaamik eqqartuussisoqassaaq, tamatumuuna Sea Shepherd unnerluutigineqarluni pinerluttulerinermut inatsimmik aamma niisarnanut inatsimmik unioqqutitsisimasutut, siorna aggustimi Vágoymi niisarnarniarnermut atatillugu.