niisarnarniarneq

Sea Shepherd Savalimmiunit qimaguppoq - tamatumuunaagallartoq

Avatangiisinilli illersuiniaqatigiit aappaagu uteqqinniarput. Akerliuniat arfineq-pingasut eqqartuussaanerannik suliaq suli naammassineqanngilaq

Sea Shepherd, Færøerne, grindefangst
imeersut Savalimmiuni aasaq niisarnarniarnermut atatillugu akornusersuisut. Akerliuniat maanna qimagussimalerput, aappaaguli uteqqissallutik. Sea Shepherd

Nunani tamalaani avatangiisinik illersuiniaqatigiiffiup Sea Shepherdip Savalimmiut tamatumuunaagallartoq qimappaat. Akerliuniat Sea Shepherdimeersut niisarnarniarneq pinngitsoortinniarlugu aasap ingerlanerani qaammatini pingasuni affarmilu Savalimmiuniipput. Illersuiniaqatigiiffiup aappaagu uteqqinnissani ilimasaarutigereerpaa.

Tamanna facebookimi quppernermi "Sea Shepherd Operation Grindstop 2014"-imi atuarneqarsinnaavoq.

Piffissami Sea Shepherdip Savalimmiuniiffigisaani niisarnat 33-t pisarineqarput. Tamatumunnga atatillugu akerliuniat 14-it tigusarineqarput. Akerliuniat 14-it tigusarineqarnerat uani (qallunaatut) atuaruk: http://sermitsiaq.ag/14-hvalaktivister-anholdt-faeroeerne

Taakkua ilaat arfinillit niisarniarnermut akornusersuisimasutut eqqartuunneqarput Savalimmiunullu ukiumi ataatsimi iseqqusaajunnaarlutik. Sinnerisa arfineq-pingasut eqqartuussivimmi suliarineqarnerat suli naammassineqanngilaq.

Illersuiniaqatigiiffik Savalimmiunut iseqqusaajunnaarpoq.

Vicepolitiinspektør Peter Thaysen nutaarsiassaqartitsivimmut in.fo-mut oqarpoq, akerlilersuiniat 75-95-it ataatsikkut Savalimmiuniittarsimasut. Katillugit 300-400-t Savalimmiuniissimapput.

Savalimmiuni oqartussat Sea Shepherdip akerliuniarluni iliuuseqarnissaanut piareersarluarsimapput Danmarkimilu immikkut sungiusarsimasunik niisarniarnermut atatillugu Sandoyimi aggustip 30-ani niisarnat 33-t pisarineqarnerannut atatillugu atorfissaqartinneqarsimasunik ikiorteqarsimallutik.

Sea Shepherdip ukioq manna niisarnarniarnermut qanoq iliorluni akornusersuisimanera uani (qallunaatut) atuaruk.

Immikkut sungiusarsimasut niisarnarniarnernut marlunnut allannut, silalli ajornera pissutigalugu taamaatiinnarneqartunut, aamma najuupput.

Savalimmiormiut Sea Shepherdimullu ilaasortat akornanni ataasiakkaatigut aporaattoqartarsimavoq, Peter Thaysenili oqarpoq, tamakku amerlanertigut annikitsuinnaasarsimasut.

Powered by Labrador CMS