Savissivimmi qernertanik qilalugarniarneq unippoq

Savissivimmi qilalukkat qernertanik pisassiissutit maanna tamakkerneqarput

Narhval

Savissivimmi qilalukkat qernertat pisassiissutigineqartut 18-t tamakkerneqartut, Aalisarnermut, Piniarnermut Nunalerinermullu Naalakkersuisoqarfik nalunaaruteqarpoq.

Aammattaaq ukiup sinnerani qilalukkanik qernertanik pisaqartoqarsinnaanngilaq.

Aalisarnermut, Piniarnermut Nunalerinermullu Naalakkersuisoqarfiup tamatuma saniatigut ilisimatitsissutigaa, Qaanaami aamma Savissivimmi qilalukkanik qaqortanik 2019-imi pisassiissutit suli sinneqartut, taakkulu suli pisarineqarsinnaasut.

Aggustimili pisassiissutit tamakkerneqarnerat nalunaarutigineqarpoq, kisianni ullut arlaqanngitsut qaangiuttut naalakkersuisoqarfik nalunaarpoq, ukiuni kingullerni pisat nalunaarsornerinik kukkusoqarsimasoq. Taamaattumillu qernertanik pingasunik pisassanik sinneruttoqarluni, taakkulu maanna pisarineqareerput.

Qilalukkanut qernertanut pisassiissutit Qaanaami akerliussutsimik takutitsisoqarneranik pisasseeqqittoqarnissaanik piumasaqartoqarneranik kinguneqarnikuuvoq. Aammattaaq Partii Naleraq, IA, Avannaata Kommunia kiisalu aalisarnermut piniarnermullu ataatsimiititaliaq saniatigut pisassiisoqarnissaanik piumasaqaateqarnikuupput.

Powered by Labrador CMS