Saviminilerinermik Ilinniarfiup nuunneqarnissaanik pilersaarutit aallarteqqinneqartut
Naalakkersuisut Saviminilerinermik Ilinniarfiup Nuummiit Sisimiunut nuunneqarnissaanik suliaq, qinersisoqarnerata kingorna unitsikkallarneqarsimasoq aallarteqqinneqassasoq aalajangersimapput.
Saviminilerinermik Ilinniarfiup nuunnissaanut suliaq ingerlatiinnarneqassaaq.
Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen (IA) tusagassiorfinnut nalunaaruteqarnermi taamatut allappoq.
Qeqqata Kommuniani komunalbestyrelsimi gruppit siulittaasuisa tamarmiusut borgmesteri Malik Berthelsen peqatigalugu qaammaammi kingullermi paaserusussimavaat, Saviminilerinermik Ilinniarfik suneqarniarnersoq.
2017-imi aalajangiunneqarpoq, ilinniarfiit teknikkimut inuussutissarsiornermullu tunngassuteqartut Sisimiuni ataatsimoortinneqalissasut, Naalakkersuisulli apriilimi qinersisoqareersoq pilersaaruti unitsikkallarsimavaat, tassa kommunalbestyrelsip januaarimi suliamut atatillugu apeqquteqarnissaata tungaanut. Kommunalbestyrelsi apeqquteqarmat Naalakkersuisut suliamik aallartitseqqissimapput, maannalu tusagassiorfinnut nalunaarummi atuarneqarsinnaavoq, pilersaarutit aallarteqqinneqarnissaat aalajangiunneqarsimasoq.
Suliaq ingerlatiinnarneqassasoq
Naalakkersuisut februaari aallartittoq Saviminilerinermik Ilinniarfiup Sisimiunut nuunnissaanut suliaq ingerlatiinnarneqassasoq aalajangerput. Naalakkersuisut tusagassiorfinnut nalunaaruteqarnermi ilisimatitsipput.
- Saviminilerinermik Ilinniarfiup nuunnissaanut suliap ingerlaqqinnissaa Naalakkersuisunit aalajangerneqartoq nuannaarutigilluinnarpara, kommunalbestyrelsip isornartorsiuineranit ullut 14-it qaangiuttut nalunaarut taamatut nipeqarpoq.
Taamaalillutik Naalakkersuisut piumasaqaatinik pisariaqartitanillu sukumiinerusumik misissuinissaminnut periarfissinneqarput, Peter Olsen oqarpoq.
Kommunalbestyrelsi pilersaarutinik ingerlatitseqqittoqarnissaanik piumasaqareersoq, Nuummi atuarfimmi sulisunit ammasumik allagaqartoqarpoq, sulisut allakkaminni illoqarfiit pingaarnersaannit nuunnissamik isumassarsiaq nuannarinngilaat. Ammasumilli allagaqarsimanerat tusagassiorfinnut nalunaarummi nutaami eqqaaneqanngilaq. Sermitsiaq.AG-mit Peter Olsen tassunga oqaaseqartinniarneqarpoq.