Saviminilerinermik Ilinniarfik suneqarniarpa

Qeqqata Kommunia naapertorlugu, Naalakkersuisut Saviminilerinermik Ilinniarfiup Sisimiunut nuunneqarnissaanik pilersaarut isertortuullugu arriisaaruppaat.

Qeqqata Kommuniata kommunalbestyrelsiani gruppit siulittaasuisa tamarmiullutik borgmesteri Malik Berthelsen peqatigalugu Naalakkersuisunut ammasumik allagaqarnermikkut Saviminilerinermik Ilinniarfiup Sisimiunut nuunneqarnissaanik pilersaarutit attatiinnaqquaat.

Naalakkersuisut 2017-imi aalajangerput, ilinniarfiit teknikkimut inuussutissarsiornermullu tunngassuteqartut Sisimiuni ataatsimoortinneqalissasut.

Taamatut aalajangertoqarmat Qeqqata Kommuniani nuannaartoqarpoq, kommunilu pingaartumik KTI-ip aamma Saviminilerinermik Ilinniarfiup Sisimiuni ataatsimuulersinneqarnissaat immikkut aallussilersimalluni.

- Saviminilerinermik ilinniarfiup Sisimiunut nuunneqarnissaa politikkikkut aalajangiunneqarmat soorunami nuannaarutigalutigulu isumalluarfiginikuuarput.

Atuarfiup assitassai tamanut saqqummiunneqarsimasut

Namminersorlutik Oqartussat siorna martsip qaammataani, titartaasussatut toqqarneqarsimasut, titartaasartut KHR, Verkis aamma S&M ilinniarfiup ilusissaatut siunnersuutaat saqqummiuppaat, pilersaarut malillugu atuarfik nutaaq 280 millioner koruuninik akeqartussaasoq.

Kommunili naapertorlugu, pilersaarutit maanna unitsinneqarsimapput.

-Pakatsissutigisatsinnillu paasivarput nuunneqarnissaanik aalajangersimanerigaluaq annerusumik tunngavilersuutitaqanngitsumik innuttaasunullu oqaluttuarineqanngitsumik Naalakkersuisuniit unitsinneqarsimasoq, kommuni Naalakkersuisunik ammasunik allagaqarnermini allappoq.

Ilinniarfimmik nuussinissamik pilersaarut, Naalakkersuisut ilinniartoqarfiit imminnut attuumassuteqartut ataatsimoortillugit katersorneqarnissaannik minnerunngitsumillu ilinniartut ilinniarnerminni sunngiffimminnilu qaffasissumik pitsaassusilimmik ataatsimoorusseqatigiissinnaanerat anguniarlugu 2013-imili periusissiaannut ilaavoq.

- Kommunit akornganni naligiinnginnerup annertusiartortup suli annertusiartuinnarnissaa Naalakkersuisut kissaatiginngikkunikku, kisianni aamma ilinniartitaanerit imminnut assingusut ataatsimoortinnerisigut inuiaqatigiinnut pissarsiassaq pitsaanerpaaq eqqarsaatigissagaanni, KTI-p Saviminilerinermillu ilinniarfiup ataatsimuulersinneqarnissaat Naalakkersuisut pingaartittariaqaraluarpaat, kommuni nangilluni allappoq.

Nuummi ilinniarfik pisoqalisimasoq

Ammasumik allakkamut atsiorsimasut erseqqissaassutigaat, pilersaarutit allanngorteqartaarneqarnerat sumulluunniit iluaqutaanngitsoq aamma Nuummi Saviminilerinermik ilinniarfiup atuarfittaa ullutsinnut naleqqukkunnaarsimagami taarserneqartariaqartoq.

- Nalornisitsineq tamanut pitsaasuunngimmat, Naalakkersuisut piaartumik innuttaasunut nassuiaatigisariaqaraluarpaat suliaq sooq unitsinneqarsimanersoq aammalu oqaluttuaralugu susoqarniarnersoq.

Sermitsiaq.AG-mit Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen (IA) oqaaseqartinniarneqarpoq.

Allakkamut atsioqataasimapput:

  • Evelyn Frederiksen, Siumut
  • Juliane Enoksen, IA
  • Siverth K. Heilmann, Atassut
  • Abel Enoksen, Naleraq
  • Borgmester Malik Berthelsen, Siumut
Powered by Labrador CMS