Savilersortoqarsimanerata kingorna inuit marluk toqusut
Kalaallit Nunaanni Politiit pigaartui unnuaq nalunaaqutaq marlunut qiteqquttut nalunaarfigineqarput Maniitsumi angerlarsimaffimmi inuit marluk toqungasut nassaarineqarsimasut.
Maniitsumi angerlarsimaffimmi savilersortoqareernerata kingorna inuit marluk toqupput.
Kalaallit Nunaanni Politiit tusagassiutinut nalunaarutiminni ilisimatitsipput pineqartut kinaassusersineqarsimasut. Pineqartup aappaa tassaavoq angut 60-it qiteqqusimalernerani ukiulik, aappaalu arnaalluni 50-it aallartilaarnerani ukiulik.
- Maniitsumi politiit patruljet sumiiffimmut ornigutipallapput, najukkamilu pineqartumi inuit marluk toqugasut siumorlugit. Savimmit kapoorneqarnermit toqusimanissaat ilimagineqarpoq, allassimavoq.
Naalagaaffiup politiivi ikiuutissapput
Kalaallit Nunaanni Politiit Danmarkimi Naalagaaffiup Politiivini pinerluttoqarsimatillugu misissuisartunik pingasunik, suliami misissuinermi ikiuuttussanik, tikisitsiumalluni piumasimavoq.
- Kalaallit Nunaanni Politiit ilisimatsitsipput suliami maanna misissuisoqartoq, maannakkumullu annerusumik oqaaseqartoqarsinnaanngitsoq. Suliamut tunngatillugu ilisimannittut pigaartut saaffiginneqqullugit kaammattorpagut, telefonnormumut uunga 70 14 48, Kalaallit Nunaanni Politiit ilisimatitsipput.
Toqusut qanigisai ilisimatinneqareerput.