Savalimmiut: Sambandsparti lagmanditut issiasuutitaqaleratarsinnaasoq
Sambandspartiip siulittaasua, Bárður Nielsen, Savalimmiuni naalakkersuisuutitaqalernissaq anguniarlugu isumaqatigiinniarnermi siuttuuvoq. Isumaqatigiinniarnerit sapaatip akunnerata tulliani marlunngornerutinnagu naammassereersimasariaqarput.
Fólkaflokkurin Savalimmiuni lagtingimut augustip 31-ani qinersinermi partiini annersanngorput. Partiini anginerpaanngoraluartoq, partiip siulittaasua Jørgen Niclasen isumaqatigiinniarnernut siuttunngortinneqanngilaq.
Partiit amerlanerpaartaasa Sambandspartiimi siulittaasoq Bárður á Steig Nielsen isumaqatigiinniarnerni siuttussatut marlunngormat toqqarpaat. Partiit lagtingimi siulittaasoq ornippaat isumaqatiginninniarnerni siuttussatut toqqarumasartik taajartorlugu.
Bárður á Steig Nielsen taamaasilluni partiinit naalakkersuisuutitaqarsimasunit tapersersorneqarpoq. Sambandspartip Fólkaflokkurin aamma Miðflokkurin siulliullugit naalakkersuisuutitaqalernissaq anguniarlugu isumaqatigiinniarfigissavai. Isumaqatigiinniarnernut siuttutut tapersersorneqarluarnera tunngavigalugu isumaqarnarsinnaavoq Savalimmiuni lagmandip tullia tassaassasoq Bárður á Steig Nielsen.
- Qinersinerup unnukkuani pingaaruteqartorujussuarmik inissippugut, Siornatigut nalunaareernikuuvugut illuatungeriinnut tamanut isumaqatigiinniarsinnaalluta. Aammali ersarilluinnartumik nalunaareerpugut Sambandspartiet, Fólkaflokkurin aamma Miðflokkurin naalakkersuisuutitaqalernissaat anguniarniarlugu. Tamanna iluatsissinnaanngippat periarfissat allat ammatippagut, Bárður á Steig Nielsen nutaarsiassaqartitsivimmut Portal.fo-mut oqarpoq.
Piffissaliussaq sivikitsoq
Isumaqatigiinniarnerit aallartereerput, suleriutigineqartumilu partiit siulittaasui issiaqatigiittassapput sammisallu pingaaruteqartut, soorlu aningaasaqarneq aningaasaqarnermilu politikki, oqaloqatigiissutigisassallugit.
Partiini taakkunani pingasuni lagtingimi ilaasortanngortut suleqatigiissitanut pingasunut agguarsimapput, eqimattallu siulliup aalisarnermut politikki oqaloqatigiissutigivaat.
Savalimmiuni politikkimik suliaqarnermi aalisarnermut politikki pingaaruteqarluinnartuuvoq. Fólkaflokkurin qineqqusaarnermini aalisarnerup iluani aaqqissuusseqqinneq atorunnaarsissallugu oqareerpoq, aaqqissuusseqqinneq naalakkersuisoqatigiissimasut kingulliit suliarigaluarpaat. Sambandspartiet aamma Miðflokkurin aamma allannguissallutik aalajangereerput.
Katissimaneq pillugu inatsit aamma aaqqiagiinngissutaasarpoq. Qinigaaffimmi kingullermi suiaaqatigiit oqaluffimmi katisinneqarsinnaalertinneqarput. Miðflokkurin ip, lagtingimut qinersinermi marlunnik issiasuutitaqalersup, suiaaqatigiit katisinneqartarunnaarnissaat qineqqusaarutigaa. Partii taama piumasaqaannassanersoq pillugu nalilersuisoqassaaq.
Bárður á Steig Nielsenip naalakkersuisoqatigiittussanik nassaarniarnissaanut septemberip qulinganut killilerneqarpoq. Tamanna iluatsinngippat siulittaasut tulleriaarneqarneranni isumaqatigiinniarnerni siuttumik toqqaaqqittoqassaaq. Sisamariarluni taama toqqaaqqittoqarsinnaavoq.
Sisamariarluni siuttussamik toqqaanerit iluatsinngippata, taava innuttaasut lagtingimut qinersisinneqaqqissapput.