Skip to main content

Savalimmiut: RAL-ip kisermaassisuunera unitsinneqartariaqarpoq

RAL Savalimmiunukartarpoq, Savalimmiunili umiarsuaatileqatigiiggiit Kalaallit Nunaannukaqqusaanngillat. Kisermaassisuuneq unitsinneqartuuppat nunanut taakkununnga marlunnut iluaqutaassagaluarpoq, Savalimmiuni naalakkersuisoq oqarpoq.

Savalimmiuni umiarsuaatileqatigiiffimmit naammagineqanngilaq, Royal Arctic Linep (RAL) Islandimiumik Eimskipimik suleqateqarluni Savalimmiunut angalasinnaanera, akerlianillu Savalimmiuni umiarsuaatileqatigiiffiit RALip kisermaassisuunera pissutigalugu Kalaallit Nunaannut angalasinnaatitaanatik.

Taamaammat Savalimmiuni niuernermut naalakkersuisoq Helgi Abrahamsen, aaqqiissutissarsiorniarluni Naalakkersuisunut saaffiginnissimavoq.

- Unammilleqatigiittoqarnera ajoriffissaqartinngilarput. Tamanna pitsaasuuvoq aamma umiarsuit Kalaallit Nunaanneersut maanga angalasarnerat nuannarilluinnarparput.

- Isumaqarpugulli umiarsuit Savalimmiuneersut Kalaallit Nunaannut angalanissamut aamma periarfissaqartinneqartariaqartut, Helgi Abrahamsen Sermitsiaq.AG-mut oqarpoq.

Piffissami qaninnerusumi ataatsimeeqateqarnissamik naatsorsuuteqartut

Taassuma oqaatigaa, Savlimmiuni umiarsuaatileqatigiiffiit Island aqqutigalugu Kalaallit Nunaannukartarnissaannut immaqalu USA-mut ingerlaqqittarnissaannut periarfissaqartut takusinnaanerarlugu.

Helgi Abrahamsen isumaqarpoq, tamanna nunanut marlunnut taakkununna iluaqutaasinnaasoq, taamatulli nalunaaruteqarnini umiarsuit Kalaallit Nunaanneersut Savalimmiunut tikilluaqqusaanngitsutut paaseqqunngilaa.

- Unammilleqatigiinnerup assersuutigalugu sanaartornermi atortussat akikinnerulersissinnaavai aamma aalisakkanik qerisuunngitsunik avammut niueruteqartarneq pitsaanerulersissinnaavaat, taanna oqarpoq.

Inatsisartunut qinersisoqarnissaa sioqqullugu Naalakkersuisut oqaloqatigisarsimavai, taassumalu naatsorsuutiginerarpaa suliaq pillugu piffissami qaninnerusumi Naalakkersuisut nutaat videokkut ataatsimeeqatiginissai.

Imaatigut assartuinissamut kisimi akuersissummik peqartoq

Namminersorlutik Oqartussat Royal Arctic Line A/S kisimiitillugu sullissisussatut isumaqatigiissuteqarfigaa Kalaallit Nunaannut tassanngaanniillu aamma Kalaallit Nunaanni illoqarfiit nunaqarfiillu akornanni nassiussanik assartuineq imaatigut ingerlanneqartoq tamakkerlugu isumagisarissagaa. 

Sullissinissamut isumaqatigiissutip kingunerisaanik tikittarnerup akulikissusianut, qanoq annertutigisumik assartuisinnaassuseqarnissamut aamma illoqarfinnik tamanik Kitaani aamma Tunumi pilersuinermik qulakkeerinninnissamut arlalinnik piumasaqaateqarpoq, umiarsuaatileqatigiiffik nittartakkamigut ilisimatitsissuteqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER