Skip to main content

Savalimmiut WHO-mut ilaasortanngorusuttoq

Savalimmiuni WHO-mut ilaasortanngornissaq piffisami sivisuumi oqaluuserineqarsimavoq, maannalu aalajangerneqarsimalluni maajip 21-ani ataatsimeersuartoqarpat Savalimmiut ilaasortanngornissamut qinnuteqassasoq. Danmarki Savalimmiut sinnerlugit FN-imi nunat tamalaat peqqissutsimut suleqatigiiffianut killilimmik pisinnaatitaaffeqarluni ilaasortanngornissamut qinnuteqaammik nassiussissaaq.

2019-imi naalakkersuisuusut Savalimmiut WHO-mut ilaasortaaneranni iluaqutaasussanik misissuillutik aallartissimapput.

Sirið Stenberg, taamanikkut peqqissutsimut naalakkersuisuusoq WHO-Europamik ataatsimeeqateqarsimavoq, tamatumalu kingorna danskit Genève-mi ambassadeata WHO-p Savalimmiullu qanimut atassuteqaqatigiinnerat misissuiffigisimavaa.

Savalimmiuni Peqqissutsimut Ministeeriaqarfik tassaavoq Savalimmiut ilaasortanngorniarnissaanik aalajangiisimasoq, Savalimmiuni peqqinnissatigut aaqqissuussaq sutigut tamatigut tamatuma nukittorsarsinnaammagu - pingaartumik maannakkut coronap nunarsuaq tamakkerlugu tuniluunnerani.

- Covid-19-ip nunarsuarmi tuniluunnerata malitsigisaanik WHO-mi nammineerluta oqaaseqarsinnaalluta nunanut tamalaanut tigussaanerusumik ilaalernissarput pissusissamisoorpoq, peqqissutsimut naalakkersuisoq Kaj Leo Holm Johannesen oqarpoq.

- Ilaasortatut ilaatigut nunarsuarmi tuniluuttoqalerpat ullormit siullermit paasissutissinneqartarnissaq qulakkiissavarput. Ilaasortaanitsigut aamma Savalimmiuni ilisimatusarnerit angusarineqartartullu ajornannginnerusumik allanut ilisimatitsissutigisinnaalissavavut, peqqissutsimut naalakkersuisoq ilanngussilluni oqarpoq.

Danmark qinnuteqaammik nassiussissasoq

Nunat namminersortut (naalagaaffiit) kisimik WHO-mi ilaasortanngorsinnaapput. Taamaammat Danmarkip Savalimmiut sinnerlugit qinnuteqaat nassiuttussaavaa.

Nunat killilimmik namminersortut killilimmik pisinnaatitaaffeqartumik ilaasortanngornissamut qinnuteqarsinnaapput. Taamatut ilaasortaagaanni siunnersuutinut taasisoqarsinnaanngilaq.

Killilimmik pisinnaatitaaffeqarlutik ilaasortat ataatsimiititaliat ataatsimiinnerinut ataatsimeersuarnernullu peqataasinnaallutillu oqaaseqarsinnaapput.

Savalimmiut ilaasortaanerat ukiumut 30.000 koruuninik akeqartassaaq, tamatumalu saniatigut ataatsimiinnermut, anaglanermut allanullu aningaasartuuteqartassalluni.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER