Savalimmiut WHO-mi ilaasortanngortoq
Savalimmiut nunat tamalaat peqqissutsimut suliniaqatigiiffianni WHO-mi killilimmik pisinnaatitaaffeqarluni ilaasortanngorsimavoq.Suliniaqatigiiffiuvoq peqqinnissatigut ajornartorsiuteqartoqartillugu ilaasortaaffigissallugu pingaaruteqarnerpaaq, Savalimmiuni peqqinnissamut naalakkersuisoq oqarpoq.
Peqqinnissamut naalakkersuisoq Kaj Leo Holm Johannesen, Sambandsflokkurin, pingasunngormat WHO-p internetsi aqqutigalugu ukiumoortumik ataatsimeersuarnerani nalunaarfigineqarsimasoq, Savalimmiut WHO-mi ilaasortanngornissamut akuerineqarsimasoq.
Savalimmiut ukiumoortumik ataatsimeersuartoqarnerani siulersuisullu ataatsimiinnerini taaseqataasinnaassanngilaq, nunalli taaseqataasinnaallutik ilaasortaasut assigalugit pisinnaatitaaffeqarlunilu pisussaaffeqassaaq. Savalimmiut aamma ataatsimiittoqarnerani oqaaseqarsinnaatitaalluni nammineq suliassaatiminik saqqummiussisinnaassaaq.
- Naalakkersuisunngoramali Savalimmiut WHO-mi killilimmik pisinnaatitaaffeqarluni piaarnerpaamik ilaasortanngornissaa anguniarniarlugu aalajangersimavunga. Taamaammat suliap taamak sukkatigisumik ingerlanneqarsimaneratigut Savalimmiut WHO-mi killilimmik pisinnaatitaaffeqarluni ullumikkut ilaasortanngortinneqarnera nuannaarutigaara, Kaj Leo Holm Johannesen oqarpoq.
Peqqinnissamut Naalakkersuisup Kiista Fenckerip Savalimmiut ilaasortanngornerani pilluaqquaa, oqaatigisinnaannginnerarpaali Kalaallit Nunaat aamma ilaasortanngorniassanersoq.
- Politikkikkut tamanna suli oqaluuserisimanngilarput, taamaammat ilaasortanngornissatsinnut piareersimanerluta maannakkorpiaq oqaatigisinnaanngilara, Kiista Fencker Sermitsiaq.AG-mut oqarpoq.
Ilisimasanik pissarsisarnissaq
Savalimmiut ilaasortanngornerat Savalimmiuni peqqinnissatigut ingerlatsinermut pingaaruteqarluinnartussaavoq, Kaj Leo Holm Johannesen erseqqissaavoq.
- Peqqinnissamut atatillugu siusinnerusukkut pissarsiarisarsinnaasimanngisatsinnik ilisimasanik ilisimatusarsimanernillu pingaaruteqarluinnartunik Savalimmiut maanna pissarsisarsinnaalerpoq. Aamma suliassaqarfimmut tunngatillugu nunanik allanik pingaaruteqarluinnartumik suleqateqalersinnaanngorpugut, naalakkersuisoq oqarpoq.
Aamma tunniussassaqartut
Savalimmiut ilisimasanik WHO-mut iluaqutaasinnaasunik aamma tunniussisinnaanngorpoq.
Nunarsuarmi corona ajornartorsiortitsivoq, Savalimmiullu misissuisarnernut, tunillatsisimasinnaasunik ujaasisarnermut, inuit mattusimasarnerannut akiuussutissalersorneqartarnerannullu atatillugit siuarsimasuulluni Taamaammat Savalimmiuni tuniluuttoqarnera aqunneqarsinnaasimavoq, taamalu ajornartorsiornermit qaangiilluarsimalluni.
Coronap ajornartorsiortitsineratut ittumik pisoqartillugu ajornatorsiutinik aqutsinissaq pineqartillugu WHO-mi ilaasortaaneq pingaaruteqarluinnartuuvoq.
- WHO-p nunarsuarmi tuniluuttoqarneranut atatillugu qanoq iliuuseqartarnissatsinnut inassuteqaatai malissimavavut. Maanna aalajangiisartut ilaasortanngorfigaavut, ilisimasanillu aamma ilisimatusarsimanernik nutaajunerpaanik ingerlaannartumik pissarsisinnaanngorluta - uagullu ilisimasatsinnik aamma tunniussisinnaanngorluta, Kaj Leo Holm Johannesen naggasiivoq.