Savalimmiut USA-mik suleqatiginninnertik annertusarpaat

Savalimmiut USA-mut aalisakkanik annertujaanik niuertarpoq, USA-llu suleqatiginera pitsaasuuvoq. Nunalli taakku akunnerminni suleqatigiinnerit pisortatigoornerulerpoq.

- Piujuaannartitsinissaq siunertaralugu aalisarneq niueqatigiinnerullu annertusarnissaa pillugu USA Savalimmiullu oqaloqatigiinnerunissamik isumaqatigiissuteqarnerat nuannaarutigaara, Mike Pompeo. Københavnimi pingasunngornermi tusagassiortunut katersortitsinermi oqarpoq.

Savalimmiuni nunanut allanut naalakkersuisoq, Jenis av Rana, Mike Pompeomik ataatsimeeqateqarsimanerminik naammagisimaarinnippoq. Ataatsimiilinnginnermi USA-p Savalimmiullu suleqatigiinnerulernissaat anguniarusussimavaa.

- Ataatsimiinneq pitsaasuuvoq. Siunnersuutigisagut ammaffigivai, Jenis av Rana oqarpoq.

Suleqatigiiffissaq

Savalimmiuni naalakkersuisoq oqarpoq suleqatigiinnermi imarisassat nunat akunnerminni maanna oqaloqatigiliissutigissagaat. Taakkulu savalimmiut naalakkersuisuinit amerikallu naalagaaffianit isumaqatigiissutitut tunngavilerneqassaaq.

- USA-p Savalimmiullu suleqatigiinnerisa nukittorsarnissaannut alloriarneq annertuujuvoq. Soqutigisagut amerlasuutigut assigiipput, pingaartumik nunarsuarmi sillimaniarneq eqqarsaatigalugu. USA-mik suleqateqarnerulernermi, inuussutissarsiornikkut, niuernikkut, ilinniarnermi, ilisimatusarnikkut, kultoorikkut allarpassuartigullu periarfissanik ammaassissaaq, Jenis av Rana oqarpoq.

Washingtonimi sinniisoqarfik

Suleqatigiinnerup annertunerulernissaanit angusat ilagaat Savalimmiut Washingtonimi sinniisoqarfeqalernissaa.

Jenis av Rana siornatigut oqarsimavoq Savalimmiut Washingtonimi sinniisoqarfeqalissasoq.

Savalimmiut maannamut Moskvami, Reykjavikimi, Bruxellesimi, Londonimi, Københavnimi aamma Beijingimi sinniisoqarfeqarpoq. Tel Avivimi sinniisoqarfeqalernissaq aamma piareersarneqarpoq.

Jenis av Rana naapertorlugu amerikap nunanut allanut ministeriata sinniisoqarfeqalernissamik siunnersuuteqartuuvoq, aperalunilu Savalimmiut Washingtonimi qaqugu sinniisoqarfeqalissanersoq.

- Oqarfigaara Israelimi sinniisoqarfik ammarneqareerpat USA-mi sinniisoqarfeqalernissamik suliaqarnissaq neriuutigarlugu. Tassa aappaagu ammaasinnaassaagut, Jenis av Rana oqarpoq.

Ataatsimiinneq oqaluttuarisaanermut ilannguttoq

Danskit naalagaaffiannut USA-p ministeriata tikeraarnerani savalimmiunit naalakkersuisoq ataatsimiinnermi aatsaat siullerpaamik peqataavoq.

Jenis av Ranap nuannaarutigaa tamanna iluatsissinnaasimammat, savalimmiut kalaallillu naalakkersuisuilu ataatsimeeqataasinnaammata.

- Annertunerusumut aallarniutaasinnaavoq. Siunnersuutinnut Mike Pompeo paasinnilluarpoq, Jenis av Rana oqarpoq.