Savalimmiut ukraimiunut qimaasunut 200-nut piareersimasut
Savalimmiut Ukrainemit qimaasunik 200-nik tigusinissaannut inatsit nutaaq qulakkeerinnissaaq. Savalimmiuni inuussutissarsiornermut naalakkersuisoq Magnus Rasmussen amerlanerusut tigunissaannut ammavoq.
Lagtingip pingasunngornermi siunnersuut, Ukrainemit qimaasunik ukiuni marlunni Savalimmiuniikkallarsinnaanermut akuersissuteqalersitsisussaq tuaviortumik suliarilerpaat.
Siullermik qimaasunut 200-nut akuersissutinik tunniussisoqarnissaa pineqarpoq.
- Savalimmiormiut pisinnaatitaaffiinik pisinnaatitaaffeqassapput, inuussutissarsiornermut naalakkersuisoq, Magnus Rasmussen (Sambandspartiet), Kringvarp Føroyamut oqarpoq.
Qimaasut P-mik normulerneqassapput (Savalimmiuni inuup normui), kissaatigigunikkulu nukissaqarunik ingerlaannaq sulilersinnaapput. Meeqqat atuarsinnaapput imaluunniit meeqqerivimmiissinnaapput, aamma peqqinnissaqarfinni neqeroorutinik atuisinnaallutik.
- Ukrainemiut aamma pisortanit pisartagaqarsinnaapput. Tamarmik Savalimmiuni innuttaasutut isigineqassapput, Magnus Rasmussen naqissusiivoq.
Ukrainemiut ikinnerpaamik 40-t tikipput
Ukrainemiut takornariatut Savalimmiuniinnerat pissutigalugu, maannakkorpiaq amerlassusaat tamakkiisumik ilisimaneqanngitsut, Magnus Rasmussenip ilisimatitsissutigaa.
Ruslandip 24. februaarimili Ukraine saassummagu, Savalimmiuni Røde Korsip Ukrainemiut 40-t tikissimasut ilisimasaqarfigaat.
Ukrainemiut 200-t Savalimmiuniikkallarnissaannut akuersissuteqarnissamik siunnersuut lagtingimi tapersersorneqarpoq, uanilu sapaatip-akunnerani akuerineqarnissaa naatsorsuutigineqarpoq.
Amerlanerusunut ammasoq
Siunnersuummi kisitsit 200 aalajangersimasumik taaneqarpoq, Savalimmiut naammassisinnaasaannik taama naliliisoqarnera pissutigalugu, kisianni kingusinnerusukkut amerlineqarsinnaapput-
- Piffissap ingerlanerani qanoq pisoqassanersoq naluarput. Kisitsit 200 amerlisissinnaavagut, aamma amerlanerusunik tigusisoqarsinnaanera qularnanngilaq. Siunnersuummi amerlassusaasa aalajangersimasuunissaat isumatusaarnerussasoq isumaqarpugut, tamanna misilittagaqarfiginnginnatsigu.
Qimaasunik tigusineq ukiup sinneranut 15,5 millionit koruuninik akeqassaaq. Saniatigut aningaasanut inatsimmi aningaasaliissuteqartoqarnissaa naatsorsuutigineqarpoq, Ukrainemiullu akuersissummik tunineqarnissaannut siunnersuut ilanngullugu akuerineqassalluni.