Savalimmiut Tuluit Nunaallu killilersugaanngitsumik niueqatigiinnissamut isumaqatigiissuteqarput

Savalimmiut aamma Tuluit Nunaata killilersugaanngitsumik niueqatigiinnissamut isumaqatigiissutaat siumut kalerriutigineqareersoq, sisamanngormat Londonimi atsiorneqarpoq.

Savalimmiunit isumaqatigiissut niunermut nunanut allanut naalakkersuisunut ilaasortamit, Poul Michelsenimit atsiorneqarpoq. Tuluit Nunaata niunermut ministeriata George Hollingberyp aamma aalisarnermut nunalerinermut ministerip, George Eusticep atsiorpaat.

Januaarip aallartinneranili isumaqatigiissut naammassineqarsimasoq Poul Michelsenip nalunaarutigaa. Maannalu atsiorneqarpoq.

EU-mi isumaqatigiissutip issuarnera

Brexit pillugu juunimi 2016-imi inunnik taasititsisoqarneraniilli Savalimmiut killiligaanngitsumik niueqatigiinnermut isumaqatigiissusiornissaq ukkataralugu suliaraat.

Killilersugaanngitsumik niuerqatigiinnermut isumaqatigiissut maanna EU-mi isumaqatigiissutaasumik aallaaveqarpoq, tassani Tuluit Nunaata aamma Savalimmiut akornanni niueqatigiinnissaannut isumaqatigiissuteqartoqarnikuulluni.

Tuluit Nuntaat avammut niuerfittut Savalimmiunut pingaaruteqarpoq. Savalimmiut 2016-imi Tuluit Nunaannut 850 millionit koruuninut tunisaqarput aamma 2017-imi 770 millionit koruuninut.

Tuluit Nunaannit ukiuni marlunni kingullerni pisiortorneq 169 aamma 284 millionit koruuniusimapput.

Kalaallit Nunaat utaqqisariaqassaaq

Kalaallit Nunaata Savalimmiut periusaat issuarsinnaanngilaa, Savalimmiormiut assigalugit EU-mut assingusumik isumaqatigiissuteqartoqanngimmat.

- Uatsinnut tunngatillugu pissutsit imminnut ilarussuunnerupput. Nunatta EU-mik niueqateqarnissamut isumaqatigiissutaani inatsisit tassunga attuumassuteqartut amerlapput. Nunatta 1985-imi niueqatigiinnissamik isumaqatigiissummik aalajangersagaa, aalisarneq pillugu EU-p Nunattalu isumaqatigiissutaat, OLT-lu matumani pineqarput. Taamaattumik taakkua assiliinnarlugit niueqatigiinnissamut isumaqatigiissusiorsinnaanngilagut, Ane Lone Bagger (S) KNR-imut oqarpoq.

Taamaattumik Tuluit Nunaata EU-mut ilaasortaajunnaarnerata kingorna isumaqatigiissusiortoqarsinnaasoq, tusagassiorfimmut innuttaasunik sullissisumut oqaluttuarpoq. Atorfilittatigut ataavartumik attaveqatigiittoqarpoq, kisianni ministeritiguunngitsoq.

Kalaallit Nunaata Tuluit Nunaannut tunisai Savalimmiunit ikinnerulaarput, tassa 680 millionit koruuniupput.