Savalimmiut russit niuernikkut isumaqatigiissuteqarfiginissaanik Danmarkip ikiorpai

Savalimmiut killilersugaanngitsumik Ruslandimut nunanullu allanut niuersinnaanissaannut isumaqatigiissuteqarnissaanik Danmarkip ikiorpai. Tamanna nunanut allanut ministerip Anders Samuelsenip (LA) akissutaani atuarneqarsinnaavoq.

Savalimmiut qaammatip tulliani Eurasiske Økonomiske Unionimut killilersugaanngitsumik niuernermut isumaqatigiissusiornissamut pilersaarnermik nalunaarummik atsiorniarpoq.

Savalimmiut taamaalilluni Ruslandip killilersugaanngitsumik niueqatiginissaanut isumaqatigiissusiornissamut qanilliallappoq, tamanna Savalimmiuni ukiuni arlalinni kissaatigineqarpoq.

Suliniutigineqartoq ilaatigut danskit politikeriinit arlalinnit isornartorsiorneqarpoq. Ilaatigut nunanut allanut oqaaseqartartoq Nick Hækkerup (S) oqariartuuteqarpoq, Savalimmiut kikkut isumannaallisaanerannik aamma namminersulivinnissaannik, kiisalu isumaqatigiissutip assigiimmik pisussaaffeqartinnissaanut qulakkeerinnittuunersut eqqaamasariaqaraat.

Nick Hækkerupip nunanut allanut ministeri Anders Samuelsen killilersugaanngitsumik niueqatigiinnissamut isumaqatigiissut pillugu pingasunik apeqquteqarfigaa. Nunanut allamut ministerip akissutaani atuarneqarsinnaavoq, Danmarkip Savalimmiuni oqartussat isumaqatigiissuteqarniarsarinermi ikiorsimagaat.

- Nunanut allanut ministeriaqarfik ataavartumik Eurasiske Økonomiske Unionip oqaloqatigineqarnerata ingerlanneqarnera pillugu ilisimatinneqartarpoq, taamatullu aamma uagut danskit tungitsinnit – ilaatigut Moskvami aallartitaqarfitsigut – Savalimmiut suliami tassani tapersernikuuarput, Anders Samuelsen Nick Hækkerupimut akissummini oqarpoq.

Powered by Labrador CMS