Savalimmiut RAL-ip kisermaassineranik atorunnaarsitsinissamut misileeqqinniartut

Savalimmiuni niuernermut inuussutissarsiornermullunaalakkersuisoq Magnus Rasmussen Sambandspartiimeersoq uniinnarusunngilaq. Royal Arctic Linep Kalaallit Nunaanniit Kalaallillu Nunaannut kisermaassilluni assartuisarnera atorunnaarsinniarlugu misileeqqinniarpoq.

Magnus Rasmussenip kingoraagaata Helgi Abrahamsenip siorna aasakkut RAL—ip Kalaallit Nunaanni assartuinermik kisermaassisuunera pillugu Naalakkersuisut oqaloqatigerusussimavai

Tamannali pisimanngilaq. Magnus Rasmusseni aggustip 19-ianili niuernermut inuussutissarsiornermullu naalakkersuisuusimavoq. Taassuma aaqqiissutissarsisoqarsinnaasimannginnera naammaginngilaa.

- Tamanna kukkulluinnartumik ingerlanneqarpoq. Tunngaviatigut ilumoortuusinnaanngilaq, kalaallit nunaminni nioqquteqartarfinnik illersuijutigalutik nioqquteqartarfinnut allanut unammillertarnerat markeder, Magnus Rasmussen Kringvarp Føroya-mut oqarpoq.

Taassuma innersuussutigaa, kalaallit umiarsuaataat Savalimmiunut angalasinnaatitaasut, Savalimmiormiut umiarsuaataat Kalaallit Nunaannut angalaqqusaanngitsut.

Unammilleqatigiinneq pitsaasuusoq

Savalimmiuni naalakkersuisup corona ajornartorsiortitsiunnaarpat Naalakkersuisut (Namminersorlutik Oqartussat) attaveqarfiginiarpai. Magnus Rasmussenip oqaatigaa, unammilleqatigiinnermi nikingasoqarnera salliutillugu Naalakkersuisut oqaloqatiginiarlugit.

- Aamma unammilleqatigiinnerup Kalaallit Nunaannut pitsaanerpaajusussaanera tunngavilersuutiginiarpara. Kalaallit niuernermi pitsaanerusunik attaveqaateqalissapput assartuinermilu appasinnerusunik akigititaqalerlutik,Magnus Rasmussen oqarpoq.

Taassuma tunngavilersuinermini aamma apeqquserpaa, RAL Islandimiumik Eimskip-imik assartueqateqartillugu, Kalaallit Nunaanni umiarsuaatileqatigiiffiup kisermaassisuunera.

Magnus Rasmussenip oqaatigaa, Kalaallit Nunaanni niuernermut inuussutissarsiornermullu naalakkersuisoq peqatigalugu aaqqiissutissarsiorneq iluatsinneqanngippat, suliaq lagmandimut tunniutissallugu eqqarsaasersuutigalugu, lagmandip Kalaallit Nunaanni Naalakkersuisut Siulittaasuannik tamatuminnga oqaloqateqarniassammat.

Naalakkersuisoq ammanerulersitsinissamut itigatitsisoq

Naalakkersuisut siulittaasuat nutaaq apeqquteqarniarluni saaffiginnikkaluarpalluunniit, Kalaallit Nunaanni Naalakkersuisut akuersaanissaat ilimananngitsutut isikkoqarpoq.

Attaveqaasersuutinut naalakkersuisoq Mariane Paviasen IA-meersoq imaatigut assartuisarnerup allanngortinneqarnissaanik ullut 14-it matuma siornatigut itigartitsivoq.

Tamanna pivoq Demokraatineersumut Jens-Frederik Nielsenimut, imaatigut assartuisarneq ammanerulersinneqarniarnersoq pillugu apeqquteqarsimasumut akissuteqarami.

- Royal Arctic Linep akuersissutaata atorunnaarsinneqarnissaa pilersaarutigineqanngilaq. Kalaallit Nunaannut, Kalaallit Nunaannit, Kalaallit Nunaatalu iluani imaatigut assartuinerup avammut ammanerulersinneqarnissaa, piffissami qaninnerusumi misissorluarnegarnikuunngilaq. Taamaalilluni aamma naatsorsuusiorfiginegarnikuunngilaq, Attaveqaasersuutinut Naalakkersuisoq Mariane Paviassen (IA) Jens-Frederik Nielsenimut akissuteqarluni allappoq.

Powered by Labrador CMS