Savalimmiut Nuummi sinniisoqarfimmik ammaalersut

Savalimmiut ukiut tulliuttut pingasut ingerlaneranni nunani allani sinniisoqarfeqalissapput marlunnik. Aappaa Nuummi inissinneqassaaq, aappaalu Washingtonimi inissinneqassalluni. Aallaqqaammut Savalimmiut Islandimi sinniisoqarfiata pisortaata Kalaallit Nunaat Islandilu sullitarissavai.

Savalimmiut Nuummi sinniisoqarfimmik ammaasussanngorput.

Savalimmiut Kalaallit Nunaanni niuernikkut suleqateqangaatsiarpoq, tamannalu suli pingaarnerutinneqartariaqarpoq. Taamaattumik Savalimmiut Nuummi sinniisoqarfimmik ammaassasoq, nunanut allanut tunngasuni naalakkersuisoq, Høgni Hoydal, Kringvarp Føroyamut ilisimatitsivoq.

Savalimmiut allaffik aallaqqaammut Islandimi sinniisoqarfimmi pilersinneqassaaq.

- Kalaallit Nunaat sorpassuartigut ineriartortorujussuuvoq. Savalimmiuni inuussutissarsiortut Savalimmiunilu kiffartuussisartut Kalaallit Nunaannik suleqatiginnissutigisinnaasaat amerlaqaat. Kalaallit Nunaat Royal Arctic Linemik Savalimmiunukartalersimavoq, aamma uagut Kalaallit Nunaanni niuerfik iserfigisariaqaraluarparput. Annertunerujussuarmik suleqatigiittariaqarnitsinnut pissutsit arlalissuit tunngavissaapput, Høgni Hoydal oqarpoq.

Island isumassarsiorfigineqarsimasoq

Høgni Hoydalip Kalaallit Nunaanni naalakkersuisoqatini, Vivian Motzfeldt, nalunaarfigisimavaa, Halla Nolsøe Poulsen, Islandimi sinniisoqarfiup pisortarisaa, aallaqqaammut Savalimmiut Kalaallit Nunaanni Islandimilu sinniisorissagaat.

Savalimmiut ukiuni kingullerni 15-ini Islandimi sinniisoqarfeqarsimapput, maannalu Halla Nolsøe Poulsen piffissap ilaani Kalaallit Nunaanniittalissaaq siunissamilu suleqatigiilernissamut sinaakkutissanik piorsaalluni.

- Toqqaannartumik oqaatigissagaanni, Savalimmiunit Islandimit sinniisoqarfeqarneq maannamut annertuumik pissarsissutigineqarsimavoq. Attaveqaaterpassuit pilersinneqarsimapput, ilaatigut sanaartornermik suliaqarfimmi. Kalaallit Nunaanni qatannguteqarnitsinnik, tamatigut Danmark aqqutiginngikkaluarlugu toqqaannartumik attaveqarfigisariakkatsinnik, Savalimmiut erseqqissaassutiginninnissaannut piffissanngorsimavoq, Høgni Hoydal oqarpoq.

USA-mi aappaagu

Naalakkersuisuusimasut Washingtonimi sinniisoqarfimmik ammaanissamik suliaqarsimappput. Høgni Hoydal ilisimatitsivoq, naalakkersuisut nutaat, siorna decembarimi pissaaneqalersut, suliaq tamanna ingerlateqqinniaraat.

- Aningaasanik nassaarniarsarivugut, neriuppugullu allaffimmik 2024-mi ammaasinnaassalluta. Alloriarnerup tullia tassaavoq, sinniisoqarfiup pisortassaanik, piffissaq tamaat Kalaallit Nunaanni sulisussamik, toqqanissaq, Høgni Hoydal oqarpoq.

Powered by Labrador CMS