Savalimmiut Nunattalu suleqatigiinnerat nukittorsarneqassasoq
Kalaallit Nunaata Savalimmiuni imarsiornermik ilinniartitsisoqartarneranik pisortanilu annikinnerusumik allaffissortarnermik misilittagaqartoqarnera isumassarsiorfigisinnaavaa. Nunallu marluk taakku aalisarnermut isumaqatigiissutaat nutarterneqarlunilu annertusineqassaaq. Lagmandip tikeraarnerani oqaluuserineqarsimasut taakku ilagaat.
Naalakkersuisut Siulittaasuata Múte B. Egedep Savalimmiunilu lagmandip Bárður á Steig Nielsenip isumaqatigiissutigisimavaat, Naalagaaffeqatigiinni nunat innuttakinnerusut marluk suleqatigiinnerat nukittorsarneqarlunilu annertusineqassasoq.
Lagmandip Kalaallit Nunaannut pisortatigoortumik tikeraarnera naggaserlugu sisamanngornermi ataatsimut tusagassiortunik katersortitsinermit tamanna nalunaarutigineqarpoq.
Siunissami qaninnerusumi ukkatarineqartussatut uku oqaatigineqarput:
- Imarsiornermi ilinniartitaanerit
- 1997-imi aalisarneq pillugu isumaqatigiissutip nutarterneqarlunilu annertusineqarnissaa
- Naalagaaffeqatigiinni nunanut allanut sillimaniarnermullu politikki
- Takornariaqarneq
Savalimmiuni imarsornermik ilinniartitsisarneq ukiuni 100-ni misilittagaqarfigineqarpoq, tamannalu ilinniarfigisinnaavarput, Múte B. Egede oqarpoq.
Kalaallit Nunaanni angallatit ilarpassuit Savalimmiormiunik aqumioqarput, nunami maani taamatut ilinniagallit naammanngimmata. Maanna ilinniartitaanermut susassaqarfimmi akisussaasut imarsiornermik ilinniartitsinermi ilinniartitsisunik paarlaaqatigiissinnaanerannut periarfissanik misissuissapput.
Naalagaaffeqatigiinneq ineriartortinneqassasoq
Politikkikkut siuttuusut taakku marluullutik ullormi tusagassiortunik katersortitsisoqarmat erseqqissaassutigaat, Naalagaaffeqatigiinnerup iluani nunanut allanut sillimaniarnermullu politikkimi sunniuteqartarnerup ineriartortinneqarluni annertusitinneqarnissaa soqutigalgu.
- Nalunngilara issittumi piginnaassanik annertusaaniarnermi ingerlatsimanerup nangeqqinnginneqarnissaa isumaqatigiissutigalutigu, Múte B. Egede ilaatigut oqarpoq.
- Nunatsinnut kingunerluuteqarsinnaasut pineqartillugit aalajangiisoqannginnerani akulerutsinneqarneq ajornerput akuersaarneqarsinnaanngilaq.
Savalimmiuni Lagmandimit taperserneqarpoq.
- Naalagaaffeqatigiinni ingerlalluartumik suleqatigiissagutta suleqatigiinnerput inerisartuartussaavarput. Attaveqartarnermut Ataatsimiititaliaq tamatuma qanoq iliuuseqarfigineqarnissaanut assersuutissatsialaavoq, taamallilluta Danmarkimut sanilliulluta innuttakinnerungaluaqaluta, nunanut allanut sillimaniarnermullu politikkimi oqaasissaqartitaanerulissalluta.
Attaveqartarnermut Ataatsimiititaliaq siorna oktobarip qaammataani pilersinneqarpoq, Naalagaaffeqatigiinni nunat pingasut nunanut allanut, sillimaniarnermut illersornissamullu politikkimi suleqatigiinnerat annertunerulersinniarlugu.
Lagmandip partiia Sambandsflokkurin, Savalimmiuni partiitut talerperliusoq inuussutissarsiutinik ineriartortitsinissamik kultureqarnermillu ukkatarinnittoq, Naalagaaffeqatigiinni suleqatigiinnerup annertusarnerqarnissaanik sulissuteqartuuvoq, tassa IA Kalaallillu Nunaanni partiit allat assigalugit Namminersulivinnissamik anguniagaqartuunngilaq.
Ineriartortoqarsimanera kakkagigaa
Bárður á Steig Nielsen 2005-imi Kalaallit Nunaanneeqqaarsimavoq 2014-ilu nunatsinneeqqissimalluni. Piffissap ingerlanerani nunap ineriartorsimanera sulilu ineriartornera kakkagivaa.
Taassuma oqaatigaa, coronap ajornartorsiortitsinerata kingorna inuit angalarusussusiat Kalaallit Nunaanni malugineqarluarsinnaassasoq, siulittaasullu taakku marluullutik oqaatigaat, takoarnariaqarneq suliassaqarfiusoq imminnut ilinniarfigisinnaasartik.
Tikeraartoqarnerani aalajangersimasumik isumaqatigiissuteqartoqarsimanngilaq, atorfilittalli Naalakkersuisullu susassaqarfinni assigiinngitsuni suleqatigiinneq annertusarniarlugu suliaqassasut oqaatigineqarpoq.
Attaveqartarnermut Ataatsimiititaliaq juunip qulingiluaani Savalimmiuni ataatsimiissaa.