Savalimmiut Nunarpullu attaveqaatit pingaarutillit misissorneqartarnerannik atuutilersitsisariaqarput
Savalimmiut Kalaallit Nunaallu attaveqaatinut pingaarutilinnut aningaasaliisarnernut misissuisarnissamik inatsimmik akuersissuteqapallattariaqarput. Michael Aastrup Jensen (V), Nunanut allanut politikkikkut aalajangiisartuni siulittaasoq, taama oqarpoq.
Issittoq pillugu nassuiaasiorneq pillugu Folketingimi 14. marts oqallinnermi sillimaniarnermut politikki oqaluuserineqarnerpaavoq.
Ruslandip aamma Kinap attaveqaatinut pingaarutilinnut sunniuteqannginnissaasa qulakkeernissaat, oqallinnerm Kalaallit Nunaat Savalimmiullu sukkanerusumik sulisariaqartut eqqaasinneqarput.
- Attaveqaatinut pingaarutilinnut tunngatillugu qaninnerusumik qanoq suleqatigiissinnaanerput isiginiartariaqarparput, Michael Aastrup Jensen oqarpoq.
Attaveqaatit pingaarutillit pillugit inatsisit amigaataasut
Ukiut marluk matuma siornatigut Danmarkip attaveqaatinut pingaarutilinnut inatsisit marluk atulersippai. Aappaa nalunaarasuartaatitigut attaveqaatinut pisiortortarfiit isumannaatsuunissaanut tunngavoq, aappaalu nunanit allanit aningaasaliisartut misissorneqartarnissaannut tunngalluni.
Attaveqaatinut pingaarutilinnut aningaasaliinerit eqqunngitsunit akisussaaffigilerneqarnissaat, Danmarkillu isumannaatsuunissaanut aarlerinartorsiornissaq inatsisip pinngitsoortissavaa.
Misissuisarneq pillugu inatsit suliassaqarfinnut sunnertiasunut tunngavoq, soorlu illersornissaqarfik, it-kkut isumannaallisaaneq, attaveqaatit pingaarutillit aamma teknologi pingaarutillit.
Inatsit Kalaallit Nunaanni Savalimmiunilu atuutinngilaq, naak sillimaniarnermut politikki Danmarkip akisussaaffigigaluaraa. Savalimmiut Kalaallit Nunaallu assingusunik inatsisiliorniaraluarput, inatsisinut tunngassuteqartunut akisussaaffiit ilaannik nunat taakku tigusinikuummata. Danmarkip inatsisinik akuersineranit ukiut marlunngulermata, Nunanut allanut tunngasunut politikkikkut aalajangiisartuni siulittaasoq, Savalimmiut Kalaallit Nunaallu pillugit utaqqisinnaajunnaarpoq.
- Taamaammat inussiarnersumik naalakkersuisunut taakkununnga marlunnut kajumissaarutiga uteqqippara. Aallartinniarta. Tassami ajoraluartumik nunarsuarmut inuuffigisatsinnut allanngorartumut tunngatillugu sianiitsorpallattariaqanngilagut, Michael Aastrup Jensen oqarpoq.
Kalaallit Nunaata nammineq isumagaa
Michael Aastrup Jensenimit oqaaseqaatip Sjúrður Skaale (S) aamma Aaja Chemnitz (IA) qisuariartippai. Naak Savalimmiuni attaveqaatit pingaarutillit pillugit inatsisit suli atulersinneqarsimanngikkaluartut, Savalimmiuni Huawei 5G-mik attaveqaasersuisussaagaluartoq atorunnaarsinneqarsimasoq, Sjúrður Skaalep Venstremi politikerimut eqqaasitsissutigaa.
Føroya Telep isummani allanngortillugu atortut taarserpai, taarsiullugulu Ericsson isumaqatigiissusiorfigaat.
Kalaallit Naalakkersuisuisa suliassaqarfiit angerlaanneqarsimasut aqunnerisa pingaaruteqassusaanut, Aaja Chemnitz innersuussivoq.
- Kalaallit akisussaaffiisa sunneri ataqqillugit tamanna pissaaq. Taamaammat kaammattuerusuppunga; oqallisigitigu. Kisianni soorunami Kalaallit Nunaat peqataatillugu, Aaja Chemnitz oqarpoq.