Skip to main content

Savalimmiut nunanut allanut ministeriat: 2016-imi qimaasunik tigusisinnaavugut

Savalimmiuni naalakkersuisut qimaasunik tigusisinnaapput, Savalimmiut qanittukkut nunani allamiunut oqartussaaffik tiguppassuk, taamatut oqarpoq Savalimmiut nunanut allanut ministeriat Poul Michelsen

Savalimmiut nunani tamalaani inuiaqartigiinni peqataasariaqarpoq, taamalu qimaasunik tigusilluni, taamatut isumaqarpoq Savalimmiut nunanut allanut ministeriat.

– Erseqqissarusuppara isumaqarama qimaasunik tigusisariaqartugut, inatsisartunut ilaasortap Kristina Clementsenip, Tjóveldi-meersup (Republikanerne) apeqqutaanut akissummini Poul Michelsen oqarpoq.

Taassuma paaserusussimavaa qimaasunik tigusisalernissamut nunanut allanut ministeri pilersaaruteqarnersoq.

Nunanulli allanut ministerip aamma erseqqissarpaa qimaasunik tigusinissamut piffissaq eqqortuunngitsoq.

Tassami qimaasunik tigusisalernissaq oqaluuserineqalersinnagu Savalimmiut nunami allamiunut oqartussaaffik tigoqqaassavaa.

Nunani allamiunut oqartussaaffik tigungajalerpaat

Nunanili allamiunut oqartussaaffik Savalimmiut qanittukkut tigussavaa.

Ukiarmi integrationsministerip Inger Støjbergip (V), Savalimmiunilu nunanut allanut ministerip isumaqatigiissutigaat oqartussaaffiup tamassuma tigunissaa piareersarneqassasoq, suliarlu tamanna upernaap ingerlanerani naammassineqassaaq.

– Siullerpaamik oqartussaaffiup silatuumik tiguneqarnissaa sammissavarput, tamatumunngalu atatillugu misissorlugu Savalimmiut qanoq isilluni qimaasunik tigusisinnaanersoq, aammalu tamanna politikkikkut amerlanerussuteqartunit tapersersorneqarnersoq, Poul Michelsen oqarpoq.

Unammilligassarujussuaq

Poul Michelsen oqarpoq qimaasunik tigusineq inuiaqatigiinnullu akulerutsitsineq suliassaq annertuujusoq. Nunarsuarmi inuiaqatigiittut allanisulli Savalimmiunut aamma taamaassaaq.

– Akulerutsitsinerli eqqarsaatigalugu simiiffinnit allanit kukkunernit ilikkagaqarnissatsinnut periarfissarissaarpugut. Takusimavarput suut atorsinnaanngitsut, allanilu takusimalluta akulerutsitsinermut iluatsitsinernik. Nunanit allanit misilittakkat tamakkua iluaqutigisinnaavagut, taamaasilluta sullissinivut sapinngisamik silatuumik naleqqussarlugit, savalimmiuni pissutsit malillugit, Poul Michelsen oqarpoq.

Sakkortuumik oqallisigineqareersimavoq

Kaj Leo Johannesen, naalakkersuisut siulittaasorisimasaat, 2015-imi ukiortaami oqalugiarnermini oqarpoq Savalimmiut ilaqutariit qimaasut 60-it angullugit amerlassusillit tigusinnaagai. Kingorna ilaqutariinnut 5-10-nut ikilisippai.

Ministeriunerusimasumilli Helle Thorning-Schmidtimik (S) 2015-imi januaarimi ataatsimeeqateqarnerup kingorna nalunaarutigineqarpoq Schengen-imi suleqatigiinnermut atatillugu isumaqatigiissuteqartoqarnissaanut Savalimmiut utaqqissasoq.

Aamma naalakkersuisuusimasut nunami allamiunut oqartussaaffiup tigunissaa sulissutigisimavaat, nalorninartoqarporli Schengen-imi suleqatigiinnermut atatillugu Savalimmiut qanoq inissisimanersoq, pissutigalugu Savalimmiut Kalaallillu Nunaat Danmarki aqqutigalugu ilaasortaammata.

Taamanikkut tamanna Savalimmiuni oqallisigineqartorujussuuvoq, ilaatigut partii naalakkersuisooqataasoq Folkeflokken isumaqarluni qimaasut Savalimmiunukartinnagit sumiiffianni ikiornissaaat pitsaanerusoq.

 

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER