Savalimmiut nunanit allanit suliartorsimasunut ilinniagaqartunullu angerlarsimasunut akiuussutissaliinissamik neqerooruteqartut

Savalimmiuni peqqinnissatigut oqartussat, inuit sivisunerusumik Savalimmiuniittussat tamarmik coronamut akiuussutissalerneqarnissaannik neqerooruteqarniarput. Tamanna ilinniartunut inunnullu Savalimmiunut suliartorsimasunut iluaqutaassaaq, Savalimmiuni peqqissutsimut naalakkersuisoq oqarpoq.

Savalimmiuni peqqissutsimut naalakkersuisoq Kaj Leo Holm Johannessen, Sambandsflokkurin, inuit piffissami sivisunerusumi Savalimmiuniittussat tamarmik akiuussutissalertinneqarnissaat anguniarlugu, akiuussutissalersuinissamut nalunaarut allanngortinniarlugu suliaqarpoq.

Nalunaarut maanna atuuttoq naapertorlugu, inuit Savalimmiuni najugaqartutut nalunaarsorneqarsimasut kisimik akeqanngitsumik akiuussutissalerneqarsinnaapput.

Savalimmiormiut 1000-it sinnilaarlugit amerlassusillit nunani allani ilinniagaqartuupput, taakkulu ilarpassui aasaanerani atuanngiffimmi Savalimmiunut angerlannginnerminni, nunami najugaqarfigisaminni akiuussutissalertinneqanngikkunik akunnattoortinneqarsinnaapput

- Ilinniagaqartut ilarpassui corona pissutigalugu qangali angerlareersimapput, taakku soorunami nunami maani akiuussutissalertinnissamut periarfissaqartinneqassapput. Pitsaavallaarnavianngilarmi, assersuutigalugu ilinniagaqartut aasaanerani atuanngiffiup nalaani pilersaaruteqartut akiuussutissalersuinerup akornusiinera pissutigalugu pilersaarumminnik taamaatitsiinnartariaqassappata, Kaj Leo Holm Johannessen oqarpoq.

Nunanit allamiunut aamma iluaqutaassasoq

Peqqinnissatigut oqartussat inassuteqaatigaat, Savalimmiuni marloriarluni kapitittoqartarnissaa. Nalunaarut taamaalilluni ilinniagaqartut saniatigut nunanit allamiunut piffissami sivisunerusumi Savalimmiuni sulisunut aamma iluaqutaassaaq. Nunaminnummi akiuussutissamik kapitikkiartorlutik aallartariaqassanngimmata.

Inui Savalimmiuni najugaqartutut nalunaarsoneqarsimanngitsut ukioqatigisatik akiuussutissalerneqartussanngorpata aggersarneqassapput. Taamaaliornikut pineqartut immikkut ittumik aaqqissuussiffigineqassanngillat.

Nalunaarummili nutaami piumasaqaataavoq, minnerpaamik ulluni 30-ni Savalimmiuniinnissaq.

- Taamatut piumasaqaateqarnikkut nalunaarutip akiuussutissalertikkiartorluni takornariarsinnaaneq pinngitsoortissavaaa – tassa inuit akeqanngitsumik akiuussutissalertinniarlutik taamaallaat Savalimmiunukarsinnaanerat pinngitsoortissavaa, Savalimmiuni peqqinnissamut ministeeriaqarfimmit oqaatigineqarpoq.

Powered by Labrador CMS