Savalimmiut nunanit allaneersunut tunngasumik pingaaruteqartumik alloriartut

Savalimmiuni oqartussat nunanit allaneersut Savalimmiuni najugaqarnissamut akuersissutissanik siunissami aalajangiisalissapput.

Savalimmiut inatsisartuisa nunanit allaneersut pillugit akisussaaffik piffissami sivitsortumi tiguniarsimavaat. Suliassaq taanna Javnaðarflokkurin (Socialdemokraterne), Framsókn aamma Tjóðveldi (Republikanerne) naalakkersuisoqatigiinnerminni 2015-imi septembarimi suliarilerpaat.

Nunanit allaneersut pillugit akisussaaffik suli tiguneqanngilaq, maannali pingaaruteqartumik alloriartoqarpoq. Savalimmiuni nunanut allanut tunngasunut ministeeriaqarfik danskillu naalakkersuisui isumaqatigiipput, nunanit allaneersut najugaqarnissamut akuersissutissatut qinnuteqaataat Savalimmiuni aalajangerneqartalissasut.

- Alloriarneq siumut ingerlaneruvoq. Nunanit allamiunut tunngatillugu suliaq taanna uagutsinnut pingaaruteqarluinnarpoq, Poul Michelsen, Framsókn, nunanut allanut tunngasunut naalakkersuisoq oqarpoq.

Akisussaaffik tamaat tigorusukkaat

Savalimmiuni oqartussat, Savalimmiunut nunanit allaneersut najugaqarnissamut qinnuteqaraangata danskit aalajagiinnginnerini tusarniarfigineqartarput. Ilaqutariit ataatsimoortinneqalernissaannut akuersissutit ilinniartullu najugaqarnissamut akuerineqartut pillugit, kikkut akuerineqarnersut ilaatigut Savalimmiut ilisimatinneqarneq ajorpoq.

Isumaqatigiissulli maanna malillugu, kikkut najugaqarnissamut akuerineqassanersut, Savalimmiut aalajangiisalissaaq.

- Nunanut allanut tunngatillugu piginnaaffigut annertunerulersissavagut, nunanullu allanut tunngasunut akisussaaffimmik tamakkiisumik tigusinissamut piareersarneruvoq pingaaruteqartoq, aamma nunap killinganik nakkutilliinermik imaqartoq. Akisussaaffinnik tigooraaneq suli ingerlassaaq, Poul Michelsen oqarpoq.

Allanik piumasaqaateqarsinnaalersut

Savalimmiuni nunanut allanut tunngasunut suliaqartut ilisimatitsipput Savalimmiunut angalanermi najugaqarnermilu piumasaqaatit maannamut allanngortinneqassanngikkallartut.

Savalimmiunili lagtingimi inatsisissatut siunnersuutigineqartussami, savalimmiuni oqartussat piumasaqarsinnaalerput nunami ataavartumik najugaqarumallutik qinnuteqartut Savalimmiunut attuumassuteqassasut aammalu oqaatsitigut piumasaqaatinik naammassinnissinnaasariaqassasut, taakkulu saniatigut savalimmiormiut kultooriannik inuiaqatigiinnillu ilisimasaqarnerusariaqartut.

Akisussaaffimmik tigusineq ukioq manna juulip 29-ani pissaaq. Ulloq taanna lagtingimi ataatsimiinnerit ammaanersiorneqassapput.

Powered by Labrador CMS