Savalimmiut naalagaaffimmit tapiissutit appartippaat
Savalimmiut naalagaaffimmit tapiissutit ukioq manna 25 millionit koruuninik appartippaa. Qinigaaffimmi matumani 100 millioninik appartitsinissami appartitsineq siulliuvoq.
Savalimmiuni naalakkersuisut Danmarkimik pisariaqartitsinerminnik annikinnerulersitsiniarlutik pilersaaruteqarput. Tamanna suliassaqarfinnik angerlaassuinikkut aamma Danmarkimit aningaasaliinerit annikillisinneqarnerisigut pilersinneqassaaq.
Sulineq ingerlavoq. Qanittukkut lagtingip isumaqatigiittup nappaatit tuniluuttut pillugit inatsit akisussaaffigilerneqarnissaa taperserpaat, poorskimilu sulinngiffeqarnissaq sioqqutilaarlugu lagtingip isumaqatigiittup 2023-mut aningaasanut inatsit akueraat, taanna 144 millionit koruuninik sinneqartoorfiuvoq.
Aningaasanut inatsisissatut siunnersuut naalagaaffimmit tapiissutit 25 millionit koruuninik appartinneqarnissaannik aamma imaqarpoq. Javnaðarflokkurinip, Tjóðveldip aamma Framsóknip, naalagaaffimmit tapiissutit ukiuni sisamani ukiumut 25 millioninik ikilisinneqartarnissaannik naalakkersuisoqatigiinnissamut isumaqatigiissutaannut tamanna naapertuuppoq.
Naalakkersuisoqatigiinnik Danmarkimut attaveqarnermik pingaartitsinerpaasunik maanna naalakkersuisoqatigiittoqanngitsoq malugineqarsinnaasoq, Tjóðveldimi aningaasaqarnermut oqaaseqartartoq, Eirikur í Jákupsstovu oqarpoq.
- Ukiut sisamat qaangiuppata naalagaaffimmit tapiissutit 100 millionit koruuninik appasinnerussapput. Tapiissutit aningaasaqarnerup katinnerinit procentinngorlugu annikitsuinnanngussanngilaq, koruuninngorlugit aamma amerlajunnaassapput, tamanna pitsaavoq, Eirikur í Jákupsstovu oqarpoq.
2021-mi naalagaaffiup tapiissutai Savalimmiuni pisortat aningaasartuutaasa 10 procentiisut amerlassuseqarput.
Naalagaaffimmit tapiissutit ukiut 15-it qaangiuppata atorunnaassasut
Lagtingimi aningaasanut inatsisissap akuerineqarnissaanut ulloq ataaseq sioqqullugu, 29. marts danskit aningaasanut inatsisissaat folketingimi siullermeerneqarpoq.
Tassanilu Javnaðarflokkurinimit folketingimut ilaasortaq, Sjúrður Skaale, Savalimmiuni Danmarkimit aningaasanik tapiiffigineqarluni sanaartornera peqqinnanngitsoq, namminerlu pilersitsinissaa pingaarnerusoq oqarpoq. Naalagaaffimmit tapiissutit ukiut qulit 15-it ingerlaneranni atorunnaartariaqartut, taanna isumaqarpoq.
Taamaalilluni nunat akornini aningaasanik nussuisarnerit atorunnaarpata, Danmarkip Savalimmiullu akornanni attaveqarneq peqqinnarnerulissaaq. Attaveqarneq taamaalilluni suleqatigiinnermik tunngaveqalissaaq, pisariaqartitsineq pinnani, Sjúrður Skaale, aningaasanut inatsisissap oqallisigineqarneranut atatillugu taama oqarpoq.
Akisussaaffinnik tigooraanerit
Naalagaaffimmit 2020-mut tapiissutit 641 millionit koruuniunissaat, novembarimi 2019-imi Savalimmiuni naalakkersuisut danskillu naalakkersuisuisa isumaqatigiissutigaat. Taamanerniilli qaffanneqarnikuunngillat. Maanna naalakkersuisoqatigiit isumaqatigiissutaat qinigaaffimmi atuutiinnassappat, naalagaaffimmit tapiissutit 2026-imi 541 millioniussapput.
Nappaatit tuniluuttut pillugit inatsisip akisussaaffigilernerata aamma tapiissutit apparneqarnerisa saniatigut, naalakkersuisut amerlanerusunik angerlaassaqarnissaminnik suliaqarput.
Lagtingimi maanna naaralaartitsiviit aamma nakorsaaneqarfiup akisussaaffigilerneqarnissaannik siunnersuuteqartoqarpoq, silaannarmillu nakkutilliinerup akisussaaffigilernissaanut sulineq aamma aallartinneqarpoq.