Savalimmiut Kalaallit Nunaallu: Kina illunik amerlanerusunik Danmarkimit tunineqarpa?
Kalaallit Nunaat nutaamik pinerluuteqarsimasunut isertitsivittaarpoq, Savalimmiullu politeeqarfittaarput timersortarfissuartaarlutillu. Kisiannili qallunaat aningaasaataat iluaqutaalluartaraluartut suli qularinnittoqartarpoq: Tassami qallunaat aningaasaataat qilersorsimanerulersitsippat?
Kalaallit Nunaanni Savalimmiuni akuttunngitsumik oqallisigineqartarpoq Danmarkimit aningaasat qanoq amerlatigisut qujarunneqartassanersut. Sumullu atorneqassanersut.
Aviisi AG taama allappoq.
Kingullermik Savalimmiuni timersortarfissuaq nutaaq isumaqatigiinngissutigineqartorujussuuvoq. Isorinnittut isumaqarput qallunaat suliniummut akulerunnerat Københavnimut qilersorsimanerulernermik pilersitsisoq.
- Savalimmiuni isornartorsiorneqarpoq qallunaat aningaasanut inatsisaanni timersortarfissuarmut 30 millioner koruuninik immikkoortitsisoqarsimammat. Lagtingip aningaasanut ataatsimiititaliaani ilaasortat arlallit, naalakkersuisoqatigiinnut ilaasortat illua’tungiliuttuneersullu, isumaqatigiissut isornartorsiorsimavaat. Taakkua isumaqarput qallunaat naalakkersuisuisa, timersortarfissuarmut tapiissutit tunniunneqarnissaannut savalimmiormiut aningaassanut inatsisaannit tapiiffigineqarnissaannik tunngavissalermatigit, savalimmiuni aningaasanut inatsisikkut tulleriiaarineq sunniuteqaqataaffigigaat, Savalimmiuni Naalagaaffiup Sinniisuata Lene Moyell Johansenip ukioq manna folketingimut nalunaarutaani siullermi allassimavoq.
Taamatuttaaq Kalaallit Nunaanni qallunaat aningaasaataat qassiiliuutaasarsimapput. 2018-imi ukiakkut Naleraq naalakkersuisoqatigiinnit tunuarpoq – Nuummilu naalakkersuisunik ajornartorsiortitsilerluni – Kalaallit Airportsip mittarfissualiassaanut marlunnut qallunaat naalagaaffiata aningaasarpassuarnik tapiissuteqarnera pissutigalugu.
- Tamanna tupannarteqaarput, taamanikkut partiip politikkikkut oqaaseqartartua Jens Napaattooq oqarpoq.
Akiuussutissat akeqanngitsut
Qallunaat aningaasaliissutaat nalinginnaasumik qallunaat akisussaaffeqarfiinut attuumassuteqartaraluarput. Saniatigooqartarpulli. Ilaatigut 2019-imi meeqqanut inuusuttunullu atugarliortunut immikkut ittumik ikiorsissutissatut 80 millioner koruunit folketingip aningaasaliissutigai. Kingullermillu coronamut akiuussutissanik akeqanngitsunik tunniussipput.
Kisiannili sooq akeqanngillat?
Tamanna folketingimut ilaasortap Aaja Chemnitz Larsenip (IA) paaserusussimavaa, peqqissutsimullu ministerimut Magnus Heunickemut (S) tamanna apeqqutigaa, ilisimaneqartutut peqqinnissaqarfik 1992-imi januaarimili tiguneqareersimammat.
- Kalaallit Nunaat akiuussutissanik akeqanngitsunik neqeroorfigineqarnissaanik aalajangerneq Kalaallit Nunaata qinnuteqarneranik tunngaveqanngilaq, nalilerneqarmalli sapinngisamik amerlanerpaat akiuussuserneqarnissaat pingaaruteqartoq taamaasiortoqarsimavoq, peqqissutsimut ministeri akivoq.
Aviisimi AG-mi atuarnerusinnaavutit. Aviisi uani pissarsiariuk: