Fiskeri-krig

Savalimmiut EU-mit pillarneqassaaq

EU qularnanngitsumik pingasunngorpat Savalimmiut sakkortuunik pillaasissavaa ammassassuarnik aalisapilunnera pissutigalugu. Savalimmiut pisassani 2010-mi nammineq 65.000 tonsinik amerlivai

Savalimmiormiut aalisagartassaminnik namminneq qaffaanerat EU-p isumaqatiginngilaa. - Aalisapilunneq, EU-kommissioni oqarpoq pingasunngorpallu aalajangiissaaq Savalimmiut qanoq pillarneqassanersoq.

Savalimmiut siunissamut aalaruluttumut piareersarpoq, pingasunngorpat EU-Kommissioni aalajangiitinnagu Savalimmiut, ammassassuarnik amerlavallaanik aalisartutut pasillerneqartoq, sakkortuunik pillaatisinneqassanersoq.
Ammassassuarnik aaqqiagiinngissuteqarneq sivisooq savalimmiuni aalisarnermut ministeri Jacob Vestergaard malilugu qularnanngitsumik kinguneqassaaq Savalimmiut nunanut EU-mut ilaasortanut ammassassuarnik tuniseqqusaajunnaarnera tamannalu peqatigalugu savalimmiormiut umiarsuaat EU-mi umiarsualivinnut tikeqqusaajunnaassapput.
Iliuutsillu tamakkua Savalimmiunut annertuunik kinguneqassapput, Jacob Vestergaard partiimit talerperlermit Folkeflokken-imeersoq oqaluttuarpoq.
– Aalisakkammi avammut tunisartakkatta ilarpassui EU-p pisiarisarpai. Amma avammut tunisartakkatta ilarpassui EU-p umiarsualivii EU-llu atortui atorlugit tuniniartarpavut.
– Taamaattumik tunisassiatsinnut tuniniaavinnik nutaanik nassaarniarnissaq uagutsinnut unammilligassaassaaq, aammalu tunisassianut pisisartunut nutaanut aqqutit nutaat atorlugit assartornerat immikkut akeqassaaq, Jacob Vestergaard Ritzau-mut oqarpoq.
Ammassassuarnik aalisapilunnermik nungusaataasumillu ingerlatsinermik EU-p pasilliineri eqqunnginnerarluinnarpai. Ministeri malillugu EU-p taarsiullugu pisassanik agguaassineq ´pitsaavallaanngitsoq´ misissortariaqaraluarpaa.
– Naatsorsuutigisimagaluarparput EU-p naalagaaffiillu sineriallit allat agguaassinermut nutaamut aaqqiissutissanik isumaqatigiinniassasut, imartani assigiinngitsuni qanoq aaligaqassusia malillugu. Taamaasiorusussimanngillalli.
Savalimmiut 2010-mmi pisassani 85.000 tonsiniit 150.000 tonsinut amerlivai.
Aamma atuaruk: Savalimmiut ammassassuarniarnerat makrellerniarnerallu juulip 31-anni EU-p aalajangiiffigissavaa
Aamma atuaruk: Savalimmiormiut: Naalakkersorneqassanngilagut
Jacob Vestergaard oqaluttuarpoq salimmiormiunut aalisartunut ammassassuarniarnissaq pisariaqartoq. Imaani nerisassat killeqarnerat pissutigalugu aalisakkat naqqanersiortut - assersuutigalugu saarulliit - siusinnerusutut amerlatigiunnaarsimapput. Savalimmiormiullu narrunissaminnut akissaqanngillat.
– Aalisakkammi inuuniutigaavut. Nioqqutissat avammut tuniniakkavut tamarmik tassaapput aalisakkat aalisakkanillu tunisassiat. Taamaattumik Savalimmiuni aalisarnerput unitsiinnarsinnaanngilarput.
– Savalimmiut imartaanni aalisakkat aalisartariaqarpavut, Jacob Vestergaard erseqqissaavoq.
Aamma Islandip ammassassuarnik aaqqiagiinngissuteqarnermi EU-mit pillarneqarnissani ilimagissavaa.

Powered by Labrador CMS