Savalimmiut EU-llu niueqatigiinnermut isumaqatigiissut annertusarpaat
EU-p aamma Savalimmiut niuernikkut isumaqatigiissutaanni ukiuni 12-ni aatsaat allannguisoqarpoq. Savalimmiut nioqqutissat ilaanni akitsuutikillipput, EU-lu savaaqqat neqaannik akitsuuteqanngitsumik amerlanerusunik Savalimmiunut eqqussisinnaalerpoq.
Savalimmiut ukiuni arlallinni EU-mut niuernikkut isumaqatigiissummi allannguinissamik kissaateqarnikuuvoq. Ataatsimut ataatsimiititaliaq savalimmiormiut atorfilittaannik aamma DG Trademeersut, EU-p niunermut pisortaqarfia, isumaqatigiissut nalilersorniarlugu aalajangersimasumik ataatsimiittarput.
Oktobarip aallartinnerani 2007-mili allanngorsimanngitsup siullermeerluni allanngorneqarnissaa illuatungeriit isumaqatigiissuteqarput.
Savalimmiut ammassaasat aamma aalisakkat nerisassaat, akitsuuteqanngitsumik EU-mut tunineqarsinnaasut allattorsimaffianut ilanngunneqarnera, isumaqatigiissummi ilaavoq. Taamaattorli aalisakkat nerisassaat 20.000 tonsinut killilerneqarput.
Illuanik EU savaaqqap neqaanik 40 tonsinik Savalimmiunut akitsuuteqanngitsumik tunisisinnaalerpoq, tamannalu Savalimmiuni innuttaasumut ataatsimut 7,7 kg-nik naleqarpoq. Savalimmiut siorna EU-mit 36 tonsinik savaaqqap neqaanik eqqussivoq.
Allannguutinik amerlanerusunik kissaateqartut
EU-mut niuernikkut isumaqatigiissummut sinaakkutit Savalimmiut naammagisimaanngilaat. Savalimmiuni naalakkersuisut allanngorartut oqaatigisarpaat, isumaqatigiissut EU-mut iluaqutaasoq.
EU-p nioqqutit tamangajaasa akitsuusersugaanngitsumik tunisinnaavai, savalimmiormiut EU-mut nioqqutissaataat allattorsimaffimmi nalunaarsugaallutik. Nioqqutissat nutaat allattorsimaffimmut ilanngunniaraanni ukiorpassuit atorneqarsinnaasut paasinarsisimavoq.
- Savalimmiut naleqqunnerusumik EU-mik suleqateqarnermik kissaateqarpoq – niuernikkut aamma suliassaqarfinni allani – taamaattumillu ataatsimut ataatsimiititaliami oqaluuserineqarput. Suleqatigiinneq pitsanngorniarlugu EU-mik attaveqaqateqarneq EU-p assigiinngitsortaani piffissami aggersumi nanginneqarnissaa isumaqatigiissutigineqarpoq, savalimmiormiut nunanut allanut ministeriaqarfia tusagassiuutinut taama nalunaaruteqarpoq.
EU-p Savalimmiullu akornanni niuernermut isumaqatigiissut 1998-imi atuutilerpoq.